وزیر اعظم نے حل شدہ شکایات کو دوبارہ کھولنے کا حکم دے دیا

🗓️ 9 اکتوبر 2021

اسلام آباد (سچ خبریں) وزیر اعظم عمران خان نےان تمام حل شدہ شکایات کو دوبارہ کھولنے کا حکم دیاہے جن میں شہریوں کو جزوی ریلیف دینے کا عندیہ دیا گیا تھا  انہوں  نے  2 ہزار 549 اداروں کی جزوی طور پر حل شدہ شکایات کو دوبارہ کھولنے کا حکم دیا ہے وفاقی سطح پر سب سے زیادہ 3181شکایات آئیسکو کی کھولی جائیں گی۔

تفصیلات کے مطابق وزیر اعظم عمران خان نے 2 ہزار 549 اداروں کی جزوی طور پر حل شدہ شکایات کو دوبارہ کھولنے کا حکم دیتے ہوئے ہدایت کی کہ 83ہزار 741شکایات کھول کر افسران کو ضروری کارروائی کیلئے تفویض کی جائیں گی۔

پی ایم ڈی یو نے کہا کہ مذکورہ تمام شکایات میں شہریوں کو جزوی ریلیف کا عندیہ دیا گیا تھا، صوبائی حکومتوں کی 40415 شکایات 2450 اداروں کو دوبارہ تفویض کی جائیں گی۔ وفاقی سطح پر سب سے زیادہ 3181شکایات آئیسکو کی کھولی جائیں گی جبکہ صوبائی سطح پر 1606پنجاب ہائی وے کی شکایات شامل ہیں۔

واضح رہے کہ خیبرپختونخوا میں پی ڈی اے کی 412 شکایات، سندھ میں کے ڈبلیو ایس بی کی 874 شکایات اور بلوچستان میں سیکنڈری ایجوکیشن کی 130شکایات سر فہرست ہیں۔ پی ایم ڈی یو کا کہنا ہے کہ عوامی شکایات کا ہر ممکن حل یقینی بنایا جائے گا۔