متحدہ عرب امارات کو پاکستان میں سرمایہ کاری کیلئے 5 منصوبے پیش کیے جانے کا امکان

?️ 24 مارچ 2025

اسلام آباد: (سچ خبریں) متحدہ عرب امارات کو پاکستان میں سرمایہ کاری کیلئے 5 منصوبے پیش کیے جانے کا امکان ظاہر کردیا گیا۔ میڈیا رپورٹس کے مطابق متحدہ عرب امارات کو جن 5 اہم معدنی منصوبے پیش کرنے پر غور کیا جارہا ہے ان میں چاغی، وزیرستان، گوادر اور بلوچستان منرل ریسورسز لمیٹڈ کے کاپر بلاکس شامل ہیں، 8 ٹریلین ڈالر مالیت کے معدنی وسائل سے استفادہ کرنے اور سرمایہ کاری کے فروغ کے لیے اپریل میں معدنی کانفرنس منعقد ہوگی۔

بتایا گیا ہے کہ یس آئی ایف سی کے ترجیحی شعبے کان کنی اور معدنیات کی ترقی و خوشحالی ملکی معیشت کے استحکام کی ضامن ہے، ایس آئی ایف سی کے تعاون سے ریکوڈک منصوبہ 2028ء تک فعال ہوگا، منصوبے میں 5.5 بلین ڈالر سرمایہ کاری ہوگی اور سالانہ 2.8 بلین ڈالر کی برآمدات متوقع ہے، سرمایہ کاری کے لیے متحدہ عرب امارات کو چاغی، وزیرستان، گوادر اور بلوچستان منرل ریسورسز لمیٹڈ کے کاپر بلاکس سمیت 80 ہزار ٹن سالانہ پیداواری صلاحیت کا پر اسمیلٹر منصوبہ پیش کیے جانے کی توقع ہے۔

حکام کی جانب سے کہا جارہا ہے کہ معدنی شعبے میں سرمایہ کاری کے فروغ کے ذریعے ایس آئی ایف سی ملکی معیشت کے استحکام کے لیے کوشاں ہے، ایس آئی ایف سی کی معاونت سے گوادر اور چاغی کو ریل نیٹ ورک سے منسلک کرنے کا منصوبہ بھی پلان میں شامل ہے جس سے معدنی نقل و حمل میں بہتری متوقع ہے، ماڑی پٹرولیم اور حکومت بلوچستان کا معدنی شعبے میں بین الاقوامی سرمایہ کاری کے لیے مشاورت کا عمل جاری ہے۔