مشرق وسطی کشیدگی: پاکستان اور چین کا فوری جنگ بندی پر زور

?️ 1 اپریل 2026

اسلام آباد (سچ خبریں) چین کے وزیر خارجہ وانگ ای اور پاکستان کے وزیر خارجہ و ڈپٹی وزیراعظم سینیٹر اسحاق ڈار نے بیجنگ میں ملاقات کی اور مشرق وسطیٰ میں جاری کشیدگی کا تفصیلی جائزہ لیا۔

ترجمان دفتر خارجہ کے مطابق دونوں ممالک نے خطے میں امن و استحکام اور فوری جنگ بندی اور تنازع کے پھیلاؤ کو روکنے کی بھرپور کوششوں کی ضرورت پر زور دیا اور کہاکہ انسانی ہمدردی کی بنیاد پر تمام متاثرہ علاقوں تک امداد پہنچانے کی اجازت ہونی چاہیے۔ ملاقات میں اس بات پر زور دیا گیا کہ ایران اور خلیجی ممالک کی خودمختاری، سرحدی سالمیت، قومی آزادی اور سیکیورٹی کے تحفظ کے لیے فوری مذاکرات کا آغاز کیا جائے۔ چین اور پاکستان تمام متعلقہ فریقین کی حمایت کرتے ہیں کہ وہ پرامن تصفیہ کے لیے بات چیت شروع کریں اور مذاکرات کے دوران طاقت کے استعمال یا دھمکیوں سے گریز کریں۔

دونوں ممالک نے کہاکہ جنگ کے دوران شہریوں اور غیر فوجی اہداف کی حفاظت کے اصول پر عمل کیا جائے۔ توانائی، پانی کے حصول اور پرامن نیوکلیئر تنصیبات سمیت اہم بنیادی ڈھانچے پر حملے فوری طور پر بند کیے جائیں اور بین الاقوامی انسانی قوانین کی مکمل پاسداری کی جائے۔ چین اور پاکستان نے زور دیا کہ آبنائے ہرمز میں موجود جہازوں اور عملے کی حفاظت کی جائے، تجارتی اور شہری جہازوں کی محفوظ اور فوری گزرگاہ کو یقینی بنایا جائے، اور اس راستے کو جلد معمول کے مطابق بحال کیا جائے۔

چین اور پاکستان نے حقیقی کثیر الجہتی اقدامات کی ضرورت پر زور دیا، اقوام متحدہ کے کردار کو مضبوط کرنے کی حمایت کی، اور خطے میں جامع امن فریم ورک قائم کرنے اور اقوام متحدہ کے منشور اور بین الاقوامی قوانین کی بنیاد پر پائیدار امن کے قیام کے لیے تعاون کرنے کی اپیل کی۔ اس اجلاس میں دونوں ممالک نے اس بات پر زور دیا کہ خطے میں پائیدار امن اور استحکام کے لیے مذاکرات، ڈپلومیسی اور بین الاقوامی قوانین کی مکمل پاسداری ضروری ہے۔

ترجمان چینی وزارت خارجہ کا کہنا تھا کہ چین اور پاکستان کے درمیان بین الاقوامی اور علاقائی اہم امور پر یکساں مؤقف پایا جاتا ہے، جس کے باعث دونوں ممالک کے درمیان قریبی سفارتی تعاون جاری ہے۔ پاکستان اور چین کے درمیان ہر موسم میں قائم رہنے والی اسٹریٹجک شراکت داری مضبوط بنیادوں پر قائم ہے، جس میں علاقائی اور عالمی معاملات پر باقاعدہ مشاورت اور قریبی رابطہ شامل ہے۔