تنازعات کے حل کیلئے سفارتکاری پر یقین رکھتا ہوں: وزیر اعظم

🗓️ 27 فروری 2022

اسلام آباد (سچ خبریں) وزیرِ اعظم عمران خان کا کہنا ہے کہ تنازعات کے حل کے لیے ہمیشہ ڈائیلاگ اور سفارت کاری پر یقین رکھتا ہوں۔ ڈائیلاگ اور سفارتکاری کی خواہش کو کمزوری کی علامت نہیں سمجھنا چاہیے۔ پاک فوج کسی بھی فوجی جارحیت کا عوام کی حمایت سے جواب دینے کے لئے مکمل تیار ہے۔

سرپرائز ڈے کے نام سے مشہور آپریشن سوفٹ ریٹورٹ کو آج 3 سال مکمل ہونے کے موقع پر وزیرِ اعظم عمران خان نے سماجی رابطے کی ویب سائٹ ٹوئٹر پر جاری کیے گئے اپنے بیان میں یہ بات کہی ہے۔انہوں نے کہا ہے کہ ڈائیلاگ کی خواہش کو کمزوری کی علامت نہیں سمجھنا چاہیے۔

وزیرِ اعظم نے مزید کہا کہ ہم نے سفارت کاری سے تنازعات کے حل کا اظہار بھارت کو 27 فروری 2019ء کے حملے کے دن بھی کیا تھا۔عمران خان کا یہ بھی کہنا ہے کہ پاک فوج کسی بھی فوجی جارحیت کا عوام کی حمایت سے جواب دے گی۔

واضح رہے کہ مقبوضہ کشمیر کے ضلع پلوامہ میں 14 فروری 2019ء کو ایک کار خود کش دھماکے میں 40 بھارتی فوجی ہلاک ہوئے تھے جس کا الزام بھارت نے براہ راست پاکستان پر عائد کیا تھا ، اسی پلوامہ واقعے کے بعد صورتحال کشیدہ ہوئی اور 26 فروری کی رات بھارتی فضائیہ نے لائن آف کنٹرول کی خلاف ورزی کی جس پر پاک فضائیہ کی بروقت جوابی کارروائی پر بھارتی طیارے بالاکوٹ کے قریب نصب ہتھیار پھینکتے ہوئے بھاگ نکلے تھے جبکہ ایک بھارتی پائلٹ ونگ کمانڈر ابھی نندن کو بھی گرفتار کر لیا گیا تھا۔