انگلش کرکٹ بورڈ کی معذرت، ہمارے مؤقف کی بڑی کامیابی ہے: فوادچوہدری

?️ 29 ستمبر 2021

اسلام آباد (سچ خبریں) وفاقی وزیر اطلاعات فواد چوہدری کا کہنا ہے کہ انگلش کرکٹ بورڈکی معذرت اور پاکستان کےدورے کااعلان ہمارے مؤقف کی بڑی کامیابی ہے اس اعلان سے پاکستان کی کرکٹ کے خلاف ایک اور سازش ناکام ہوئی۔ انہوں نے کھلاڑیوں، سفارتکاروں اور میڈیا کا شکریہ ادا کیا۔

تفصیلات کے مطابق وفاقی وزیر اطلاعات فواد چوہدری نے سماجی رابطے کی ویب سائٹ ٹوئٹر پر دورہ پاکستان سے انکار پر انگلش کرکٹ بورڈ چیف کی معافی پر ردعمل دیتے ہوئے کہا کہ انگلش کرکٹ بورڈکی معذرت اور پاکستان کےدورے کااعلان ہمارے مؤقف کی بڑی کامیابی ہے، کرکٹ کےکھلاڑیوں،سفارت کاروں،انٹرنیشنل میڈیااورتمام لوگوں کاشکریہ، پاکستان کی کرکٹ کے خلاف ایک اور سازش ناکام ہوئی۔

یاد رہے انگلش کرکٹ بورڈ کے چیئرمین آئن واٹمور نے دورہ پاکستان منسوخ کرنے پر معافی مانگتے ہوئے کہا تھا کہ آئندہ برس پورے ٹور کےلیے پاکستان جائیں گے اور آئندہ سال انگلینڈ کی ٹیم تین ٹیسٹ میچ اور پانچ ون ڈے کھیلنے پاکستان جائے گی۔

آئن واٹمور کا کہنا تھا کہ پاکستان نہ جانے کا فیصلہ انتہائی مشکل تھا لیکن سیکیورٹی ماہرین کے مشورے پر ٹیم کو پاکستان نہ بھیجنے کا فیصلہ کیا تاہم نیوزی لینڈ کرکٹ ٹیم کے پاکستان سے جانا بھی فیصلے کی وجہ بنا۔

انہوں نے کہا کہ انگلینڈ کرکٹ ٹیم کے پاکستان نہ جانے سے جس کا بھی دل دکھا ہو، اس سے معذرت چاہتا ہوں، انگلش کرکٹ بورڈ کو پاکستان کے ساتھ اپنے تعلقات دوبارہ تعمیر کرنے کی ضرورت ہے، وہ گزشتہ سال انگلینڈ آنے پر پاکستان کے بےحد مشکور ہیں۔