امیر قطر کا وزیراعظم سے ٹیلیفونک رابطہ، مشرق وسطی کی صورتحال پر گفتگو

?️ 15 جنوری 2026

اسلام آباد (سچ خبریں) قطر کے امیر شیخ تمیم بن حمد الثانی اور وزیراعظم شہباز شریف کے درمیان ٹیلیفون پر گفتگو ہوئی، جس میں مشرق وسطیٰ کی تازہ صورتحال پر تبادلہ خیال کیا گیا۔

وزیراعظم آفس کے مطابق قطر کے امیر نے وزیراعظم شہباز شریف سے فون پر رابطہ کیا، دونوں رہنماؤں نے پاکستان اور قطر کے دوطرفہ تعلقات میں جاری مثبت پیش رفت پر اطمینان کا اظہار کیا۔ وزیراعظم آفس کا کہنا ہے کہ گفتگو کے دوران مشرق وسطیٰ میں ہونے والی حالیہ پیش رفت بھی زیر بحث آئی۔

وزیراعظم شہباز شریف نے خطے میں مذاکرات اور ثالثی کے عمل میں قطر کے فعال کردار کی تعریف کی اور کشیدگی میں کمی کے لیے قطر کی سنجیدہ اور مؤثر کوششوں کو سراہا۔

وزیراعظم آفس کے مطابق وزیراعظم نے اس موقع پر کہا کہ پاکستان خطے میں امن اور استحکام کے فروغ کے لیے اپنا تعمیری کردار ادا کرتا رہے گا۔

اس کے ساتھ ہی دونوں رہنماؤں نے باہمی رابطے برقرار رکھنے پر بھی اتفاق کیا۔