ویوو کے ایکس 100 سیریز کے فونز متعارف

14 مئی 2024

سچ خبریں: اسمارٹ فون بنانے والی چینی کمپنی ویوو نے ایکس 100 سیریز کے تین فونز پیش کردیے، کمپنی نے کچھ ہفتے قبل ہی ایکس 100 سیریز کا سستا فون متعارف کرایا تھا۔

اب کمپنی نے ویوو: ایکس 100 ایس، ایکس 100 پرو اور ایکس 100 الٹرا پیش کردیے، جنہیں کیمروں اور فیچرز کے حوالے سے معیاری فون قرار دیا جا رہا ہے۔

کمپنی نے تینوں فونز کے تین بیک کیمروں جب کہ ایک فرنٹ کیمرا کے ساتھ متعارف کرایا ہے اور تینوں فونز میں طاقتور بیٹری 5 ہزار ایم اے ایچ دی ہے۔

کمپنی نے تینوں فونز کو 80 سے 100 واٹ فاسٹ چارجر کے ساتھ پیش کیا ہے جب کہ تمام فونز کی اسکرین 76-6 انچ اور اس سے کچھ زیادہ ہے۔

ویوو: ایکس 100 ایس، ایکس 100 پرو اور ایکس 100 الٹرا کو مختلف 8، 12 اور 16 جی بی ریم جب کہ 256 اور 512 جی بی میموریز کے ساتھ پیش کیا ہے۔

کمپنی نے ویوو: ایکس 100 ایس کے بیک پر تینوں 50 میگا پکسلز کے کیمرے دیے ہیں جب کہ فرنٹ پر 32 میگا پکسل سیلفی کیمرا دیا ہے۔

اسی طرح ویوو: ایکس 100 پرو میں بھی کمپنی نے بیک پر تینوں 50 میگا پکسل کے کیمرے دیے ہیں اور فرنٹ پر 32 میگا پکسل کیمرا دیا ہے۔

کمپنی کا دعویٰ ہے کہ فونز کے کیمروں کے لینس کو اپگریڈ کرکے انہیں جدید ٹیکنالوجی سے لیس کردیا گیا ہے۔

اسی طرح کمپنی نے ویوو: ایکس 100 الٹرا کے بیک پر بھی تین کیمرے دیے ہیں، جس میں سے ایک کیمرا 200 میگا پکسل جب کہ باقی دونوں کیمرے 50 میگا پکسل کے ہیں۔

ویوو: ایکس 100 الٹرا کے فرنٹ پر 50 میگا پکسل سیلفی کیمرا دیا گیا ہے جب کہ تینوں فونز میں فنگر پرنٹ سینسر سمیت دوسرے سیکیورٹی فیچرز بھی دیے گئے ہیں۔

کمپنی نے تمام فونز کی قیمتیں ماڈیولز کے حساب سے مختلف رکھی ہیں اور سب سے کم موبائل فون ویوو: ایکس 100 ایس کی 8 جی بی ماڈیول کی قیمت بھی ایک لاکھ روپے کے قریب بھی ہے۔

اسی طرح کمپنی نے ویوو: ایکس 100 الٹرا کے 16 جی بی ماڈیول کی سب سے زیادہ قیمت پاکستانی تین لاکھ روپے رکھی ہے۔

کمپنی کے تینوں فونز کی قیمتیں پاکستانی ایک لاکھ سے تین لاکھ روپے تک ہیں جب کہ کمپنی کی جانب سے کچھ ہفتے قبل متعارف کرائے گئے ویوو: ایکس 100 کی قیمتیں بھی 80 ہزار سے 95 ہزار روپے تک تھیں۔