خسارے کا شکار ریاستی ملکیتی اداروں کی نجکاری حکومت کی اولین ترجیح ہے۔ وزیراعظم

?️ 6 جنوری 2026

اسلام آباد (سچ خبریں) وزیر اعظم شہباز شریف نے کہا ہے کہ خسارے کا شکار ریاستی ملکیتی اداروں کی نجکاری حکومت کی اولین ترجیح ہے۔

وزیر اعظم شہباز شریف کی زیر صدارت نجکاری کمیشن کے امور پر اجلاس ہوا۔ اجلاس کو نجکاری کمیشن میں جاری اصلاحات پر بریفنگ دی گئی۔ بریفنگ میں کہا گیا کہ بجلی تقسیم کار کمپنیوں کی نجکاری کو ابتدائی طور پر 2 بیچز میں رکھا گیا ہے۔ پہلے بیچ میں آئیسکو، کیپکو اور فیسکو کی نجکاری ہو گی۔ جبکہ دوسرے بیچ میں حیدرآباد الیکٹرک سپلائی کمپنی اور سکھر الیکٹرک پاور کمپنی کی نجکاری ہوگی۔

وزیر اعظم کی نجکاری کمیشن میں اصلاحات کے حوالے سے کام تیز کرنے کی ہدایت کی۔ جبکہ نجکاری کمیشن میں پبلک ریلیشنز، مارکیٹنگ کے شعبے کو مزید بہتر بنانے اور نجکاری کمیشن کو ڈیجیٹائز کرنے کی ہدایات جاری کر دیں۔ شہباز شریف نے کہا کہ خسارے کا شکار ریاستی ملکیتی اداروں کی نجکاری حکومت کی اولین ترجیح ہے۔ اور قومی ایئر لائن (پی آئی اے) کے 75 فیصد حصص کی کامیاب نجکاری بارش کا پہلا قطرہ ہے۔

انہوں نے کہا کہ نجی شعبے اور مارکیٹ سے بہترین صلاحیتوں کے حامل متعلقہ افرادی قوت کو تعینات کیا جائے۔ اور تمام تر تعیناتیاں انتہائی شفاف انداز میں کی جائیں۔ نجکاری کے حوالے سے تمام منصوبوں کا عالمی معیار کی فرم سے تھرڈ پارٹی آڈٹ کروایا جائے۔