مقبوضہ فلسطین میں غیر معمولی نفسیاتی بحران

4 فروری 2024

سچ خبریں: صیہونی حکومت کے سرکاری حلقوں نے مقبوضہ علاقوں میں غزہ جنگ کی وجہ سے فوجیوں اور مقبوضہ علاقوں کے دیگر باشندوں کے درمیان انتہائی غیر معمولی ذہنی بحران اور ذہنی انتشار کی خبر دی ہے۔

برطانوی طبی جریدے لانسیٹ نے اپنی ایک رپورٹ میں لکھا ہے کہ مقبوضہ علاقوں کے تمام باشندوں کو 7 اکتوبر کو مزاحمتی گروپوں کی کارروائیوں کے غیر معمولی نتائج سے دوچار ہونا پڑا ہے۔

یہ بھی پڑھیں: غزہ صیہونیوں کے لیے ایسا جہنم ہے جس سے باہر نکلنا ممکن نہیں

اس رپورٹ میں اس بات پر زور دیا گیا ہے کہ مقبوضہ علاقوں میں متاثرین کی تعداد کے لحاظ سے اور متاثرین کے ڈپریشن کی گہرائی کے لحاظ سے ایک وسیع پیمانے پر ذہنی بحران پیدا ہو گیا ہے جس کے مقبوضہ علاقے کے مکینوں کی ذہنی صحت پر واضح اثرات مرتب ہو رہے ہیں۔

صیہونی حکومت کی وزارت صحت کے ڈائریکٹر جنرل موشے بار اسیمنتوف نے کہا ہے کہ 7 اکتوبر سے اب تک تقریباً ایک لاکھ افراد ذہنی امراض اور صدمے کا شکار ہوچکے ہیں اور تقریباً دو لاکھ افراد مقبوضہ علاقوں سے نکل چکے ہیں۔

صیہونی حکومت کے وزیر صحت یوریل بوسو نے بھی کہا کہ اسرائیل کو اپنی تاریخ کے سب سے بڑے ذہنی صحت کے بحران کا سامنا ہے، اس کے علاوہ اسرائیل میں دماغی صحت کا شعبہ گہرے خلاء کا شکار ہوا ہے۔

اس سلسلے میں صہیونی فوج کے بحالی کے شعبے نے غزہ جنگ کے نتیجے میں دماغی امراض میں مبتلا فوجیوں کی مدد کے لیے ایک خصوصی پروگرام بھی شروع کیا ہے۔

اس حوالے سے یدیعوت احرونٹ اخبار نے لکھا ہے کہ ذہنی مسائل اور عوارض میں مبتلا صیہونی حکومت کے فوجیوں میں خودکشی کے رجحان کی تحقیقات کے لیے نرسوں اور نفسیاتی ماہرین پر مشتمل ٹیمیں تشکیل دی گئی ہیں۔

اس اخبار نے کہا کہ غزہ کی جنگ میں اسرائیل کو بہت زیادہ جان اور مالی نقصان ہوا ہے ، خاص طور پر معذور فوجیوں میں نفسیاتی مسائل میں اضافہ ہوا ہے۔

مزید پڑھیں: صیہونی غزہ میں انسانی امداد کیوں نہیں آنے دے رہے ہیں؟

اس رپورٹ کے مطابق 2800 فوجیوں کو دماغی بحالی کے شعبے میں منتقل کیا گیا ہے، جن میں سے 3% کو شدید مسائل اور 18% کو صدمے کے بعد کی تھکاوٹ کی وجہ سے ذہنی مسائل ہیں۔