مصر نے غزہ میں اسرائیلی فوج کی شمولیت مسترد کر دی

مصر نے غزہ میں اسرائیلی فوج کی شمولیت مسترد کر دی

لبنان کے روزنامہ الاخبار کے مطابق، مصر نے واضح طور پر اعلان کیا ہے کہ وہ غزہ میں کسی بین الاقوامی امن فورس میں اس وقت تک شریک نہیں ہوگا جب تک کہ اس فورس کے مقاصد، اختیارات اور کردار مکمل طور پر واضح نہ ہوں، اور اس میں اسرائیلی فوجیوں کی موجودگی کو سختی سے مسترد کیا گیا ہے۔

مصری ذرائع کے حوالے سے بتایا گیا کہ قاہرہ کسی ایسے بین الاقوامی مشن میں شامل نہیں ہوگا جس کا ہدف فلسطینی مزاحمتی ڈھانچے کو ختم کرنا یا اسرائیل کی نیابت میں حماس کے خلاف کارروائی کرنا ہو۔

ذرائع نے مزید انکشاف کیا کہ انڈونیشیا اور ترکی جیسے ممالک نے بھی غزہ میں امن فورس میں شرکت کی مشروط آمادگی ظاہر کی ہے، لیکن اس شرط کے ساتھ کہ ان کی افواج کا اسرائیلی اہلکاروں سے کوئی رابطہ یا مشترکہ کارروائی نہ ہو۔

الاخبار نے اپنی رپورٹ میں بتایا کہ حال ہی میں مصر کے خفیہ ادارے کے سربراہ حسن رشاد نے تل ابیب میں اسرائیلی وزیرِ اعظم بنیامین نیتن یاہو سے ملاقات کی۔ مصری ذرائع کے مطابق یہ ملاقات امریکی دباؤ کے تحت ہوئی تاکہ قاہرہ اور تل ابیب کے درمیان غزہ میں دوسرے مرحلے کے جنگ بندی معاہدے کے حوالے سے ہم آہنگی بڑھائی جا سکے۔

رپورٹ کے مطابق، اسرائیلی میڈیا نے انکشاف کیا ہے کہ غزہ میں بین الاقوامی فورس کی تعیناتی پر قاہرہ، واشنگٹن اور تل ابیب کے درمیان گہرے اختلافات پیدا ہو گئے ہیں۔

مصر چاہتا ہے کہ غیر ملکی ٹیمیں غزہ میں داخل ہو کر اسرائیلی قیدیوں کی لاشیں تلاش کریں، لیکن اسرائیل کا موقف ہے کہ حماس خود اس کام کو انجام دینے کی صلاحیت رکھتی ہے اور صرف وقت ضائع کر رہی ہے۔ تل ابیب اس بات پر اصرار کر رہا ہے کہ تمام لاشوں کی بازیابی کے بعد ہی آتش بس کے دوسرے مرحلے پر عمل درآمد کیا جائے۔