مراکش میں ہزاروں کی تعداد میں لوگوں نے فلسطین سے یکجہتی کا اظہار کیا

?️ 30 نومبر 2025

مراکش میں ہزاروں کی تعداد میں لوگوں نے فلسطین سے یکجہتی کا اظہار کیا

مراکش کے ہزاروں شہریوں نے ملک کے 30 شہروں میں سڑکوں پر نکل کر غزہ کے محصور عوام کے ساتھ یکجہتی کا اظہار کرتے ہوئے اپنی حکومت سے اسرائیل کے ساتھ تعلقات کی معمول پر لانے کی پالیسی ختم کرنے کا مطالبہ کیا ہے۔

العربی الجدید کے مطابق یہ احتجاج اتوار کی شب "فلسطین کی حمایت اور نارملائزیشن کے خلاف قومی محاذ” کی اپیل پر کیا گیا، جو مراکش کی ایک سرگرم عوامی تنظیم ہے۔ مظاہرین نے اسرائیل کی جانب سے غزہ میں جاری مسلسل بمباری اور انسانی جانوں کے ضیاع کی شدید مذمت کی۔

شرکاء کا کہنا تھا کہ عرب ممالک کی جانب سے اسرائیل کے ساتھ تعلقات معمول پر لانے کے معاہدے دراصل تل ابیب کو مزید حوصلہ دیتے ہیں کہ وہ غزہ کے شہریوں کے خلاف بربریت جاری رکھے۔ مظاہروں میں مراکش کے دارالحکومت رباط میں قائم اسرائیلی لائزن آفس کو بند کرنے کا بھی واضح مطالبہ کیا گیا۔

یہ احتجاج عالمی یومِ یکجہتیِ فلسطین کے موقع پر منعقد کیا گیا۔ رپورٹ کے مطابق مراکش میں اسرائیلی جارحیت کے خلاف نئے احتجاجی سلسلے کا آغاز 18 مارچ 2025 کو ہوا، جبکہ آپریشن "طوفان الاقصی” کے بعد ملک بھر میں فلسطین کے حق میں اجتماعات تقریباً روزانہ کی بنیاد پر جاری ہیں۔

واضح رہے کہ اسرائیل نے 7 اکتوبر 2023 کو غزہ پر جنگ مسلط کی تھی جس کا مقصد حماس کو ختم کرنا اور اسرائیلی اسیران کی بازیابی تھا، تاہم وہ اپنے دونوں اہداف میں ناکام رہا اور بعدازاں قیدیوں کے تبادلے پر مبنی معاہدے کی طرف بڑھنے پر مجبور ہوا۔

حماس نے 17 اکتوبر 2025 کو ایک بیان میں جنگ بندی اور قیدیوں کے تبادلے کے معاہدے کی باضابطہ تصدیق کی۔ اس کے ایک روز بعد اسرائیلی فوج نے بھی غزہ میں جنگ بندی کے نفاذ کا اعلان کرتے ہوئے کہا کہ معاہدے کے مطابق اس کے دستے کچھ مخصوص علاقوں میں موجود رہیں گے اور جنوب و شمال کے درمیان آمدورفت الرشید اسٹریٹ اور صلاح الدین روڈ کے ذریعے ممکن ہوگی۔

تاہم اسرائیل پر یہ الزام برقرار ہے کہ وہ جنگ بندی کے پہلے مرحلے کی شقوں پر عمل درآمد میں رکاوٹیں کھڑی کرتا ہے اور بار بار معاہدے کی خلاف ورزیوں کا مرتکب ہوتا ہے۔