لبنانی عوام معیشت کی زبوں حالی کے خلاف ایک بار پھر سڑکوں پر

?️ 29 نومبر 2021

سچ خبریں:درجنوں لبنانی نوجوانوں نے ایک پاور پلانٹ پر حملہ کیا اور ملک میں بجلی کی بندش اور روزی روٹی کے بحران کے خلاف احتجاج کرتے ہوئے دو اہم سڑکوں کو بلاک کردیا۔

اناطولیہ خبر رساں ایجنسی کی رپورٹ کے مطابق شمالی لبنان کے شہر حلبا کے درجنوں رہائشیوں نے بجلی کی طویل بندش کے خلاف احتجاج کرتے ہوئے شہر کے پاور پلانٹ پر حملہ کیا،رپورٹ کے مطابق عینی شاہدین نے بتایا ہے کہ درجنوں نوجوان لبنانیوں نے حلبا شہر کے مرکزی پاور پلانٹ پر حملہ کیا اور اپنے شہر میں بجلی کا مطالبہ کیا تاکہ رہائشیوں کو روشنی دی جاسکے اور گرم کیا جاسکے، خاص طور پر ان سرد دنوں میں۔

اناطولیہ خبر رساں ایجنسی نے عینی شاہدین کے حوالے سے بتایاکہ دریں اثناءدرجنوں دیگر لبنانی نوجوانوں نے حالات زندگی کی بگڑتی ہوئی صورتحال کے خلاف احتجاج میں ملک کے شمال میں طرابلس-عکار ٹرانسپورٹ روٹ کو بند کر دیا،اس کے علاوہ بقاع کے علاقے میں لبنانی مظاہرین کے ایک اور گروپ نے شام کی سرحد کی طرف جانے والی مرکزی سڑک کو دو گھنٹے تک بلاک کر رکھا تھا۔

واضح رہے کہ گزشتہ ہفتے لبنانی میڈیا نے اپنی رپوٹس میں کہا کہ اس ملک کی قومی کرنسی بدھ کے روز ٹریڈنگ کے دوران 20000 پاؤنڈ فی ڈالر سے زیادہ تک گر گئی تھی جس سے یہ ظاہر ہوتا ہے کہ گزشتہ ماہ نئی حکومت کے اعلان کے بعد سے ملکی کرنسی اپنی تقریباً تمام قدر میں ہونے والے اضافہ کو کھو چکی ہے۔

یادرہے کہ لبنان کو دو سال سے زائد عرصے سے شدید اقتصادی بحران کا سامنا ہےجسے عالمی بینک دنیا کے تین بڑے اقتصادی بحرانوں میں سے ایک سمجھتا ہے جس کی وجہ سے اس ملک کے مالیاتی اور معاشی وسائل تباہ ہو گئے ہیں اور لبنان میں غربت اور بے روزگاری میں اضافہ ہوا ہے۔