دو سالہ جنگ نے اسرائیلی فوج کو بُری طرح فرسودہ کر دیا:صہیونی میڈیا

?️ 2 دسمبر 2025

دو سالہ جنگ نے اسرائیلی فوج کو بُری طرح فرسودہ کر دیا:صہیونی میڈیا

 ایک صہیونی روزنامے نے اپنی تازہ رپورٹ میں انکشاف کیا ہے کہ مسلسل دو سال اور دو ماہ تک سات محاذوں پر جاری شدید جنگ نے اسرائیلی فوج کی صلاحیتوں کو بُری طرح متاثر کیا ہے؛ افسران تھکن سے نڈھال ہیں جبکہ فوجی اپنے گھروں کو واپس جانے کے خواب دیکھ رہے ہیں۔

رپورٹ کے مطابق، معاریو نے لکھا کہ اسرائیلی فوج کو اس وقت تقریباً ۱۲ ہزار اہلکاروں کی شدید کمی کا سامنا ہے، جن میں ۹ ہزار جنگی اور تقریباً ۳ ہزار معاون عملہ شامل ہے۔ یہ تعداد ایک منظم ڈویژن کے برابر ہے جو عملی طور پر فوج سے غائب ہے۔

معاریو نے مزید بتایا کہ اس شدید قلت کو پورا کرنے کے لیے سنہ ۲۰۲۶ میں ریزرو فوجیوں کو کم از کم ۶۰ دن کے لیے طلب کیے جانے کا امکان ہے۔

رپورٹ میں کہا گیا ہے کہ اسرائیلی پارلیمنٹ (کنست) کا ایک رکن لازمی فوجی سروس سے متعلق قانون میں ترمیم کی تجویز بھی دے چکا ہے، جس کا مقصد جنگی دباؤ کے تحت فوج کو درپیش سنگین افرادی بحران پر قابو پانا ہے۔

صہیونی میڈیا کے مطابق، اس صورتحال نے نہ صرف فوج کی جنگی صلاحیتوں کو کمزور کر دیا ہے بلکہ اسرائیلی سماج میں بھی بے چینی اور عدم اطمینان میں اضافہ ہوا ہے، جہاں عوام طویل جنگ کے نتائج اور اس کے مستقبل پر اثرات سے پریشان ہیں۔