ایران میں افزودہ یورینیم کے ذخائر کی تصدیق ممکن نہیں

 ایران میں افزودہ یورینیم کے ذخائر کی تصدیق ممکن نہیں

بین الاقوامی جوہری توانائی ایجنسی نے اپنی تازہ رپورٹ میں ایران کی جوہری سرگرمیوں اور افزودہ یورینیم کے ذخائر کی موجودہ صورتحال بیان کی ہے۔

خبر رساں ادارے کے مطابق گورنرز کونسل کے رکن ممالک میں تقسیم کی گئی اس دستاویز میں کہا گیا ہے کہ حالیہ بارہ روزہ جنگ کے بعد ایران نے متاثرہ جوہری تنصیبات تک معائنہ کاروں کو رسائی نہیں دی، جس کے باعث ایجنسی افزودگی سے متعلق سرگرمیوں کے تعطل اور یورینیم کے ذخائر کی مقدار کی تصدیق نہیں کر پا رہی۔

رپورٹ میں یہ بھی کہا گیا ہے کہ ایجنسی اس وقت ایران میں موجود افزودہ یورینیم کے ذخائر کے حجم، نوعیت اور مقام کے بارے میں کوئی حتمی معلومات فراہم کرنے کی پوزیشن میں نہیں ہے اور جوہری مواد سے متعلق معلومات کے تسلسل میں پیدا ہونے والا خلل فوری توجہ کا متقاضی ہے۔

دوسری جانب ایران اور ایجنسی کے درمیان تعاون حالیہ حملوں اور ایرانی پارلیمان کے منظور کردہ قانون کے بعد بعض پابندیوں کا شکار ہوا۔ بعد ازاں دونوں فریقوں کے درمیان تکنیکی سطح پر بات چیت ہوئی جس کے نتیجے میں ایک عبوری مفاہمت طے پائی، تاہم مغربی ممالک کی جانب سے ایران کے جوہری پروگرام پر تنقیدی مؤقف اور قرارداد کی منظوری کے بعد اس مفاہمت پر عملدرآمد روک دیا گیا۔

ایران کا کہنا ہے کہ وہ جوہری عدم پھیلاؤ کے معاہدے کا رکن ہے اور جامع حفاظتی معاہدے کے تحت اپنی ذمہ داریاں نبھاتا رہے گا، جبکہ جوہری ایجنسی کے ساتھ تعاون ملکی قانون کے دائرے میں جاری رکھا جائے گا۔

واضح رہے کہ ۲۰۱۵ میں طے پانے والا ایران کا جوہری معاہدہ، جس کے تحت پابندیوں کے خاتمے اور جوہری سرگرمیوں کی حدود کا تعین کیا گیا تھا، امریکہ کی یکطرفہ علیحدگی کے بعد عملی طور پر معطل ہو گیا تھا، جس کے بعد ایران نے بھی اپنے بعض وعدوں میں مرحلہ وار کمی کی تھی۔ ایران کا مؤقف ہے کہ وہ ایسے پائیدار اور قابل اعتماد معاہدے کے لیے تیار ہے جس کے تحت پابندیوں کا مؤثر اور یقینی خاتمہ ممکن ہو۔