بین الاقوامی فوجداری عدالت کو ختم کر دیں گے!: امریکہ

?️ 14 جولائی 2026

سچ خبریں:امریکی وزیر خارجہ مارکو روبیو نے امریکہ اور صہیونی حکومت کی مبینہ جارحیت کی تحقیقات کے لیے بین الاقوامی فوجداری عدالت کی کوششوں کے تناظر میں اس ادارے کو ختم کرنے کا مطالبہ کیا ہے۔

امریکی وزیر خارجہ مارکو روبیو نے بین الاقوامی فوجداری عدالت کو ختم کرنے کا اعلان کرتے ہوئے کہا ہے کہ امریکہ اور اس کے اتحادی اس ادارے کو تحلیل کرنے کے لیے ہر ممکن اقدام کریں گے۔ انہوں نے امریکہ اور صہیونی حکومت کے خلاف تحقیقات کی کوششوں پر بھی سخت ردعمل ظاہر کیا۔

آر ٹی نیوز ایجنسی کی رپورٹ کے مطابق امریکی وزیر خارجہ مارکو روبیو نے کہا کہ ہم حکومت کے اختیار میں موجود ہر ذریعے کو استعمال کرتے ہوئے اور ہر اس اتحادی کے ساتھ تعاون کرتے ہوئے جو ہمارے مشترکہ مقصد کے حصول میں مدد دے سکتا ہو، بین الاقوامی فوجداری عدالت کو ختم کر دیں گے، اور اگر ضرورت پڑی تو اسے اینٹ سے اینٹ بجا دیں گے۔

انہوں نے بین الاقوامی فوجداری عدالت پر الزام عائد کیا کہ اسے بائیں بازو سے وابستہ غیر سرکاری تنظیموں کے ایک طاقتور نیٹ ورک اور ترقی پذیر ممالک کی حکومتوں کی حمایت اور سرپرستی حاصل ہے، جو امریکہ کے خلاف اپنی دشمنی کی بنیاد پر متحد ہوئی ہیں۔

ان کے بقول یہ عدالت گولی یا میزائل سے نہیں بلکہ نام نہاد بین الاقوامی قانون کی طاقت کے ذریعے واشنگٹن کے خلاف جنگ چھیڑے ہوئے ہے۔

روبیو نے مزید کہا کہ بیرونی اداروں کی جانب سے یہ الزامات کہ تارکین وطن کو ایل سلواڈور بھیجنا اور امریکہ کی جانب سے مبینہ منشیات اسمگلروں کے خلاف مہلک بحری حملے بین الاقوامی قوانین کی خلاف ورزی ہیں، درست نہیں ہیں۔

انہوں نے ایک تنظیم کی جانب سے بین الاقوامی فوجداری عدالت سے امریکہ کے ایران کے خلاف مبینہ جنگی جرائم کی تحقیقات شروع کرنے کی درخواست کو بھی مسترد کر دیا۔

بین الاقوامی فوجداری عدالت سے امریکہ کی ناراضی ڈونلڈ ٹرمپ کے پہلے صدارتی دور سے چلی آ رہی ہے، جب اس قانونی ادارے نے افغانستان میں امریکی افواج کی جانب سے مبینہ جنگی جرائم کی تحقیقات کی کوشش کی تھی، جس کے بعد اسے شدید امریکی دباؤ اور تنقید کا سامنا کرنا پڑا۔

ڈونلڈ ٹرمپ کے دوسرے صدارتی دور میں بھی عدالت کے ان حکام کے خلاف مختلف پابندیاں عائد کی گئیں جنہوں نے امریکہ اور صہیونی حکومت کے مبینہ جرائم کی تحقیقات کی کوشش کی تھی۔