پاکستان و سعودی عرب کے رہنماؤں کی ملاقات؛ مسئلہ فلسطین پر تبادلۂ خیال

سچ خبریں:وزیر اعظم شہباز شریف اور سعودی ولیعہد محمد بن سلمان نے مکہ مکرمہ میں ملاقات کے دوران غزہ کی صورتحال پر گہری تشویش کا اظہار کیا اور مسئلہ فلسطین کے منصفانہ اور پائیدار حل کی غیر مشروط حمایت کا اعادہ کیا۔ دونوں رہنماؤں نے دوطرفہ تعاون بڑھانے اور خطے میں امن و استحکام کے لیے کوششوں پر بھی اتفاق کیا۔

وزیر اعظم شہباز شریف نے اپنے سرکاری دورہ سعودی عرب کے دوران مکہ مکرمہ میں سعودی ولیعہد محمد بن سلمان سے ملاقات کی، جہاں دونوں رہنماؤں نے خطے میں پائیدار امن، انسانی بحران اور مسئلہ فلسطین کے حل پر تبادلہ خیال کیا۔

وزیر اعظم کے دفتر کی جانب سے جاری کردہ بیان کے مطابق، شہباز شریف اعلیٰ سطحی وفد کے ہمراہ مکہ مکرمہ پہنچے جہاں انہوں نے ولیعہد محمد بن سلمان سے ملاقات کی، دونوں رہنماؤں نے اس بات پر اتفاق کیا کہ پاکستان اور سعودی عرب کے درمیان اسٹریٹجک تعاون کو عوامی امنگوں اور باہمی وژن کے مطابق مزید فروغ دیا جائے گا۔

دونوں ممالک کے رہنماؤں نے باہمی تعلقات کو مزید گہرا کرنے کے لیے اپنے عزم کا اعادہ کیا، اس سلسلے میں وزیر اعظم پاکستان نے سعودی ولیعہد کو سرکاری دورہ پاکستان کی دعوت دی، جو انہوں نے قبول کر لی۔

ملاقات میں غزہ میں جاری انسانی بحران پر تفصیلی بات چیت کی گئی۔ دونوں رہنماؤں نے عالمی برادری کی اخلاقی اور قانونی ذمہ داریوں پر زور دیتے ہوئے کہا کہ موجودہ صورتحال کا تقاضا ہے کہ بین الاقوامی ادارے فوری اقدامات کریں۔

شہباز شریف اور محمد بن سلمان نے فلسطین کے مسئلے کے لیے منصفانہ اور پائیدار حل کی غیر مشروط حمایت کا اعادہ کیا، جو اقوام متحدہ کی سلامتی کونسل کی متعلقہ قراردادوں کے مطابق ہو۔

مزید پڑھیں:سعودی عرب اور پاکستان کو مل کر کیا کرنا چاہیے:مولانا فضل الرحمٰن

وزیر اعظم نے جنوبی ایشیا میں کشیدگی کے دوران ریاض کے فعال کردار اور امن و استحکام کے فروغ کے لیے اس کے پختہ عزم کو سراہا۔ انہوں نے بھارت کی جانب سے کی گئی جارحیت کے مقابل پاکستان کی پالیسی کو ذمہ دارانہ اور پرخویشتن قرار دیا اور اس بات پر زور دیا کہ جنوبی ایشیا میں مستقل امن صرف بات چیت کے ذریعے ہی ممکن ہے۔