نیو یارک ٹائمز سکوائر میں 21 سالہ جوان مسلح افراد کی فائرنگ سے شدید زخمی ہوگیا

28 جون 2021

نیویارک (سچ خبریں)  امریکی شہر نیویارک ٹائمز سکوائر میں ایک 21 سالہ جوان مسلح افراد کی فائرنگ سے شدید زخمی ہوگیا جس سے ایک بار پھر امریکہ میں اسلحہ کی آزادی کی وجہ سے ہونے والے جرائم کو بے نقاب کردیا ہے۔

تفصیلات کے مطابق امریکی شہر نیویارک میں ٹائمز سکوائر میں فائرنگ کے نیتجے میں ایک 21 سالہ جوان زخمی ہو گیا ہے۔

غیر ملکی خبر رساں ایجنسی کی رپورٹ کے مطابق پولیس ترجمان کا کہنا تھا کہ واقعہ گزشتہ روز مقامی وقت کے مطابق شام کو 5 بجکر 15 منٹ پر اس وقت پیش آیا جب ایک شخص اپنی فیملی کے ہمراہ براڈ وے پر میریٹ مارکوس ہوٹل کے پاس سے گزر رہا تھا کہ اچانک ایک گولی اس کی پیٹھ میں آلگی جس کے نیتجے میں وہ شخص شدید زخمی ہو گیا۔

ترجمان کا کہنا تھا کہ متاثرہ شخص کو گولی دوافراد کے آپس کے تنازعے میں غیر ارادی طور پر لگی ہے۔

ریسکیو ٹیم نے زخمی ہونے والے شخص کو فوری طور پر ہسپتال منتقل کر دیا ہے، ہسپتال حکام کے مطابق اس شخص کی جان اب خطرے سے باہر ہے۔

انہوں نے بتایا کہ پولیس نے واقعے سے متعلق تفتیش کا آغاز کر دیا ہے تاہم ابھی تک کوئی گرفتاری عمل میں نہیں آئی ہے۔

موصولہ اطلاعات کے مطابق یہ واقعہ اس مقام سے چند میٹر دور واقع ہوا ہے جہاں پچھلے مہینے ایک چار سالہ بچی کو گولی مار دی گئی تھی۔

اگرچہ امریکہ میں فائرنگ کے واقعات اور ان واقعات سے ہلاکتوں کے بارے میں روزانہ بہت سی خبریں آرہی ہیں، لیکن اسلحہ کی طاقتور لابی اس ملک میں اسلحہ پر پابندی لگانے کے لئے کوئی قانون پاس نہیں ہونے دے رہی ہے۔

امریکہ میں اسلحے کی دستیابی اور دوکانوں میں مختلف اقسام کے اسلحہ کی فروخت کے سبب زیادہ تر لوگ ذاتی طور پر اسلحہ کے مالک بن گئے ہیں، یہی وجہ ہے کہ اس ملک میں اسلحہ استعمال کرنے والے افراد اور ہلاکتوں کی تعداد بہت زیادہ ہے۔