شکر گزاری سب سے بڑی دولت، مایوسی سب سے بڑا کفر ہے، عاطف اسلم

🗓️ 23 فروری 2024

کراچی: (سچ خبریں) گلوکار عاطف اسلم کی روحانی اور مذہبی باتیں کرنے کی ویڈیو وائرل ہوگئی، جس میں وہ خدا اور اس کی وحدانیت سمیت شکر گزاری اور مایوسی پر باتیں کرتے دکھائی دیے۔

عاطف اسلم کی وائرل ہونے والی ویڈیو کچھ عرصہ قبل دیے گئے ان کے ایک انٹرویو کی ہے، جس میں انہوں نے کیریئر، روحانیت اور مذہب کی جانب اپنے راغب ہونے کی باتیں کی تھیں۔

اب سوشل میڈیا پر وائرل ہونے والی مختصر کلپ میں عاطف اسلم مایوسی اور شکر گزاری پر بات کرتے دکھائی دیے۔

گلوکار کا کہنا تھا کہ مایوسی سب سے بڑا کفر ہے اور جو شخص خدا کے ساتھ روابط میں رہتا ہے، وہ کبھی مایوس ہو ہی نہیں سکتا اور مومن کی پہلی نشانی ہی یہی ہوتی ہے۔

عاطف اسلم کے کہتے ہیں مومن کے پروردگار سے رابطے میں کمی ہوسکتی ہے، طریقہ غلط ہو سکتا یا کمی پیشی ہو سکتی ہے، صحیح جگہ پہنچ نہیں پا رہے ہوں گے لیکن جیسے ہی صحیح جگہ پر پہنچیں گے تو سب ٹھیک ہوجائے گا۔

گلوکار کا مزید کہنا تھا کہ سب سے بڑی دولت شکر گزاری ہے، انسان نے دنیا اور بچوں کے لیے مال بنا لیا ہوتا ہے لیکن اس کی سب سے بڑی دولت شکر گزاری ہوتی ہے۔

عاطف اسلم نے روحانیت سے بھرپور باتیں کرتے ہوئے کہا کہ خدا کو شکر گزاری بہت پسند ہے، اسے وحدانیت پسند ہے اور وہ چاہتا ہے کہ مومن اس سے مانگے۔

انہوں نے لوگوں کو مشورہ دیا کہ وہ جب بھی خدا سے دعا مانگیں تو پہلے ان کے محبوب حضرت محمد مصطفیٰ صلی اللہ علیہ و آلہ وسلم کا نام لیں، پھر خدا کو پکاریں اور پھر دعا مانگیں تو ضرور قبول ہوگی۔

گلوکار کی روحانیت سے بھرپور گفتگو کی ویڈیو وائرل ہونے کے بعد لوگوں نے ان کی تعریفیں کیں اور انہیں بہترین شخصیت اور خیالات کا مالک قرار دیا۔

اس سے قبل بھی عاطف اسلم روحانیت کی باتیں کرتے دکھائی دیتے رہے ہیں، اسی انٹرویو میں انہوں نے کہا تھا کہ اگر انہوں نے کبھی غلطی سے کوئی نامناسب الفاظ پر مبنی شاعری گائی تو بعد میں احساس ہونے کے بعد خدا سے معافی مانگی ہے۔

گلوکار کا کہنا تھا کہ جو بات غلط ہے، وہ ہمیشہ غلط رہتی ہے اور وہ غلطیوں پر خدا سے معافی کے طلب گار رہے ہیں۔