بھارتی فوج نے مقبوضہ کشمیر میں متعدد گھروں کو تباہ کردیا، درجنوں کشمیری شہید اور زخمی ہوگئے

?️ 15 مارچ 2021

سرینگر (سچ خبریں) بھارتی فوج نے مقبوضہ کشمیر کے ضلع شوپیان میں  میں متعدد گھروں کو دھماکہ خیزمواد سے اڑا دیا جبکہ درجنوں کشمیری نوجوانوں کو شہید اور زخمی کردیا ہے۔

تفصیلات کے مطابق مقبوضہ کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران ضلع شوپیان میں دو اور کشمیری نوجوانوں کو شہید اور دھماکہ خیزمواد سے متعد د گھروں کو اڑا دیا۔

بھارتی نفوجیوں نے سوگواران پر گولیوں اور پیلٹ گنوں کے بے دریغ استعمال سے درجنوں کو زخمی کردیا جن میں سے کئی کی حالت تشویشناک ہے۔

کشمیرمیڈیا سروس کے مطابق نوجوانوں کی میتیں ضلع کے علاقے راولپورہ میں گزشتہ تین روز سے جاری تلاشی اور محاصرے کی پر تشدد کارروائیوں کے دوران تباہ کئے گئے مکانوں کے ملبے سے ملی ہیں، ملبے سے دوسرے نوجوان کی لاش ملتے ہی فوجیوں نے سوگواران پر گولیوں اور پیلٹ گنوں کا بے دریغ استعمال کرکے دودرجن سے زائد افراد زخمی کردیئے، تین نوجوان جن کی آنکھیں پیلٹ لگنے سے زخمی ہوئی ہیں ان کی بصارت کھونے کا خدشہ ہے۔

زخمی نوجوان جن میں سے بیشتر کی عمریں 18سے 22 سال کے درمیان ہیں وہ سرینگر کے ایک ہسپتال میں زیر علاج ہیں۔

بھارتی فوجیوں نے علاقے میں متعدد گھروں کو آگ بھی لگا دی، بھارتی فوج کی اس ظالمانہ کارروائی کے خلاف علاقے میں زبردست بھارت مخالف مظاہرے کئے گئے۔

بھارتی پولیس کے آئی جی وجے کمار نے صحافیوں سے گفتگو کرتے ہوئے دعویٰ کیا ہے کہ شہید کئے گئے دو نوجوانوں میں مجاہد کمانڈر ولایت لون المعروف سجاد افغانی شامل ہیں۔

دریں اثنا قابض بھارتی انتظامیہ نے ضلع شوپیاں میں انٹرنیٹ سروس معطل کردی ہے اور علاقے کو ہر طرف سے مکمل محاصرے میں لے لیا ہے اور کسی بھی میڈیا والے کو علاقے میں جانے کی اجازت نہیں دی گئی جبکہ تازہ ترین اطلاعات کے مطابق اطراف کے علاقوں میں بھی سرچ آپریشن شروع کردیا ہے۔