تل ابیب دمشق اور السویداء کے درمیان غیر فوجی حفاظتی زون قائم کرنے کا خواہاں ہے

تل ابیب دمشق اور السویداء کے درمیان غیر فوجی حفاظتی زون قائم کرنے کا خواہاں ہے

اسرائیلی ذرائع ابلاغ نے انکشاف کیا ہے کہ حالیہ دنوں میں شامی حکام کے ساتھ ہونے والی بات چیت کے دوران اسرائیل نے دمشق اور السویداء کے درمیان واقع علاقے کو غیر فوجی زون بنانے پر زور دیا ہے.

لبنانی چینل المیادین کے مطابق، اسرائیلی چینل کان نے رپورٹ کیا ہے کہ اسرائیل نے اس شرط کو مذاکرات کا ایک بنیادی نکتہ قرار دیا ہے۔ اس مطالبے کا مقصد جنوبی شام میں کشیدگی کو کم کرنا اور ممکنہ خطرات کا سدباب کرنا ہے۔

یہ خبر ایک ایسے وقت میں سامنے آئی ہے جب فرانسیسی خبر رساں ادارے اے ایف پی  نے بدھ کے روز ایک باخبر سفارتی ذریعے کے حوالے سے رپورٹ دی کہ آذربائیجان کے دارالحکومت باکو میں شام اور اسرائیل کے اعلیٰ حکام کے درمیان ملاقات متوقع ہے۔ اس ملاقات میں شام کے وزیر خارجہ اسعد الشیبانی اور اسرائیلی وزیر برائے اسٹریٹجک امور ران درمر شرکت کریں گے۔

قبل ازیں، روزنامہ الوطن نے بھی ایک سفارتی ذریعے کے حوالے سے انکشاف کیا تھا کہ شامی وزارت خارجہ اور انٹیلیجنس ادارے کے نمائندوں نے پیرس میں ایک خفیہ اجلاس میں اسرائیلی وفد سے ملاقات کی۔ اس ملاقات میں امریکی ثالثی بھی شامل تھی اور بات چیت کا محور جنوبی شام کی سیکیورٹی صورت حال اور السویداء میں کشیدگی کو کم کرنے کے امکانات تھے۔

ذرائع کا کہنا ہے کہ ان مذاکرات میں کوئی حتمی معاہدہ طے نہیں پایا اور گفتگو محض ابتدائی مشاورتی نوعیت کی تھی، جس کا مقصد دونوں فریقین کے درمیان رابطے کی بحالی اور کشیدگی میں کمی کے امکانات کا جائزہ لینا تھا۔

شامی وفد نے مذاکرات کے دوران ملک کی وحدت، خودمختاری اور سالمیت پر زور دیتے ہوئے واضح کیا کہ السویداء اور اس کے باسی شام کا اٹوٹ حصہ ہیں اور انہیں کسی صورت علیحدہ یا کمزور نہیں کیا جا سکتا۔