بھارتی فوج نے رمضان المبارک کے پہلے روز ہی کشمیری عوام کے گھروں میں گھس کر دہشت گردی شروع کردی

?️ 14 اپریل 2021

سرینگر (سچ خبریں)  بھارتی فوج نے رمضان المبارک کے پہلے روز ہی کشمیری عوام کے گھروں میں گھس کر دہشت گردی کرتے ہوئے لوگوں کو ہراساں کرنا شروع کردیا۔

تفصیلات کے مطابق مقبوضہ کشمیر میں بھارتی فوجی کولگام اور دیگر علاقوں میں رمضان المبارک کی پہلی رات کے وقت گھروں میں گھس گئے اور مکینوں کو ہراساں کیا اور انکے ساتھ گالم گلوچ کی۔

کشمیر میڈیاسروس کے مطابق مقامی لوگوں نے کہا کہ قابض بھارتی فوجیوں نے رمضان میں بھی ان پر مظالم کا سلسلہ جاری رکھا ہوا ہے۔

سوشل میڈیا پر وائرل ہونے والی ایک ویڈیو میں کولگام کے علاقے فرصل کی ایک خاتون کو گھروں پر فوجیوں کے چھاپوں کے خلاف آواز اٹھاتے ہوئے دیکھا جاسکتا ہے، خاتون نے کہا کہ فوجیوں نے رمضان المبارک کی پہلی رات کو گھروں پر چھاپوں کے دوران لوگوں کو ہراساں کیا اور خواتین کو سحری کیلئے کھانا تیار کرنے سے روکا۔

دریں اثناء سرینگر اور دیگر علاقوں میں آج ایک بار پھربینرز آویزاں کئے گئے جن میں کشمیریوں کے اس عزم کا اعادہ کیاگیا کہ حق خودارادیت تنازعہ کشمیر کا واحد حل ہے۔

جموں و کشمیر لبریشن لیگ، جموں و کشمیر ڈیموکریٹک جسٹس پارٹی اور جموں و کشمیر جسٹس اینڈ پیس انشییٹوکی طرف سے صورہ، لال چوک، آبی گزر، نوشہرہ،حول، جڈی بل اور دیگر علاقوں میں لگائے گئے بینرز میں کہاگیا ہے کہ کشمیر کوئی علاقائی تنازعہ یا امن وامان کا مسئلہ نہیں بلکہ بین الاقوامی سطح پر تسلیم شدہ تنازعہ ہے جس کو ہنگامی بنیادوں پر حل کرنے کی ضرورت ہے۔

کشمیر میڈیا سروس کی طرف سے جاری کی گئی ایک رپورٹ میں کہا گیا ہے کہ مودی کی فسطائی بھارتی حکومت انسانیت کے خلاف جرائم بالخصوص مقبوضہ جموں و کشمیر میں کئے گئے اقدامات کی وجہ سے اپنی گرتی ہوئی ساکھ کو بچانے کے لئے رائیسنا ڈائیلاگ جیسی تقریبات کی میزبانی کرکے عالمی برادری کو گمراہ کرنے کی کوشش کررہا ہے۔

رپورٹ میں کہا گیا ہے کہ رائیسینا مذاکرات جن کا آغاز 2016 میں ہوا، بھارت کی طرف سے جیوپولیٹکس اور جیو اکنامکس کے پرکشش بینر تلے منعقد کی جانے والی ایک کثیرملکی کانفرنس ہے جو دراصل بھارتی حکمرانوں کی ایک اور منافقانہ کارروائی ہے تاکہ بھارتی سامراج کے مذموم عزائم سے توجہ ہٹائی جائے۔

رپورٹ میں بھارت کے اس دعوے کو کہ ایسی تقریبات سے بھارت انسانی معاشرے میں استحکام لانے کی کوشش کررہا ہے، مسترد کرتے ہوئے کہا گیا ہے کہ بھارت اپنے ہمسایہ ممالک پاکستان اور چین کے خلاف تخریبی کارروائیوں میں مصروف ہے جس سے یورپی یونین کی ڈس انفو لیب نے حال ہی میں پردہ اٹھایا ہے۔

کانگریس کے سینئر رہنما اور سابق بھارتی وزیر سیف الدین سوز نے بھارت کے نائب صدر ایم وینکیا نائیڈوکے حالیہ بیان پر رد عمل ظاہر کرتے ہوئے کہا ہے کہ دفعہ 370 کی منسوخی غلط اور غیر آئینی اقدام تھا اور کشمیر ی عوام کو اس کے خلاف اپنی آواز بلند کرنے کا پورا حق ہے۔