نواز شریف اور آصف زرداری کی تاریخ کی سب سے بڑی غلطی کیا ہوگی؟ سابق وفاقی وزیر کی زبانی

🗓️ 24 جولائی 2024

سچ خبریں: سابق وفاقی وزیر فواد چوہدری نے پاکستان تحریک انصاف پر پابندی عائد کرنے کے فیصلہ کو نواز شریف اور آصف زرداری کی تاریخ کی سب سے بڑی غلطی قرار دیا۔

لاہور میں میڈیا سے گفتگو کرتے ہوئے فواد چوہدری نے انسداد دہشتگردی عدالت کے معزز جج پر عدم اعتماد کا اظہار کیا اور کہا کہ دنیا پاکستان میں انسانی حقوق کی خلاف ورزیاں دیکھ رہی ہے۔

یہ بھی پڑھیں: پاکستانی عوام کی سیاسی نسل کشی روکی جائے، پی ٹی آئی کے عالمی تنظیموں کو خطوط

ایک سوال کے جواب میں انہوں نے کہا کہ پی ٹی آئی کے بانی کو 14 ماہ سے جیل میں رکھا ہوا ہے، لیکن اس کا کوئی خاص اثر نہیں ہوا۔

انہوں نے مزید کہا کہ بلے کا نشان چھینا گیا اور مختلف نشانات دیے گئے، پھر بھی لوگوں نے پی ٹی آئی کو ووٹ دیے۔

فواد چوہدری نے کہا کہ ڈیجیٹل دہشتگردی پی ٹی آئی کی طرف سے نہیں ہو رہی ہے، بلکہ یہ بیرون ملک سے ہو رہی ہے۔

انہوں نے کہا کہ کابینہ کی میٹنگ میں تحریک انصاف پر پابندی کا عمل آج کیا جا رہا ہے اور نواز شریف اور زرداری تاریخ کی سب سے بڑی غلطی کرنے جا رہے ہیں،اس غلطی کے بعد آپ کسی کو منہ دکھانے کے قابل نہیں ہوں گے۔

فواد چوہدری نے کہا کہ حکومت نہ سپریم کورٹ کو مان رہی ہے اور نہ ہی کسی قانون کو۔ رؤف حسن اور احمد کو فوری رہا کیا جائے۔

مزید پڑھیں: کیا ہمارے خفیہ ادارے شہریوں کی کالز اور پیغامات سنتے ہیں؟

عدالت اور عوام کے ساتھ لڑائی اور معیشت کی تباہی شروع ہو چکی ہے، آنے والے دنوں میں لوگ چیخیں گے۔

سابق وفاقی وزیر نے کہا کہ کالعدم تحریک طالبان پاکستان (ٹی ٹی پی) سمیت دیگر جماعتوں کی کسی صورت حوصلہ افزائی نہیں ہونی چاہیے۔