پنجاب حکومت کا کورونا کا مقابلہ کرنے کے لئے اہم فیصلہ

?️ 1 اگست 2021

لاہور(سچ خبریں) پنجاب حکومت نے کورونا کی چوتھی لہر کا مقابلہ کرنے کے لئے اہم فیصلہ کرتے ہوئے  “کانٹی جنسی” پلان تیار کرنےکا فیصلہ کیاہے، حکام کو ہدایت کردی ہے کہ بیڈز،ادویات،آکسیجن سلنڈرز،وینٹی لیٹرزکی کمی نہ ہونےپائے، وزیراعلیٰ پنجاب کا کہنا ہے کہ شرح میں اضافہ ہواتو اسمارٹ لاک ڈاؤن کرنا پڑسکتا ہے۔

تفصیلات کے مطابق وزیر صحت یاسمین راشد، چیف سیکرٹری کی زیرصدارت اجلاس ہوا، اجلاس میں کورونا کی چوتھی لہر سے نمٹنے کی حکمت عملی پر غور کیا گیا۔سیکریٹری صحت محمد عامر جان کا کہنا تھا کہ کرونا کی موجودہ لہر سےنمٹنےکےلئےکانٹی جنسی پلان تیار کرنےکا فیصلہ کیا ہے، حکام کو ہدایت کردی ہے کہ بیڈز،ادویات،آکسیجن سلنڈرز،وینٹی لیٹرزکی کمی نہ ہونےپائے۔

دوسری جانب وزیراعلیٰ پنجاب سردار عثمان بزدار نے عندیہ دیا ہے کہ کرونا کیسز میں اضافہ ہوا تو اسمارٹ لاک ڈاؤن کرنا پڑسکتا ہے، حکومتی ہدایات پر عملدرآمد کرنا شہریوں کے مفاد میں ہے، ایس او پیز پر عمل سےشہری خود کو اور دوسروں کو محفوظ بناسکتےہیں۔

سردار عثمان بزدار نے کہا کہ پابندیوں سےبچنےکےلیےاحتیاط کادامن ہاتھ سےنہیں چھوڑنا چاہیے ،کورونا سے بچاؤ کے لئے ویکسین لگوانا سب سے مؤثر ہے، شہریوں سےاپیل ہے ماسک استعمال اورسماجی فاصلے برقرار رکھیں۔

عثمان بزدار کا کہنا تھا کہ کورونا کی موجودہ صورتحال کےباعث شہریوں کو سنجیدگی دکھانی ہوگی، ہر شہری کو ذمےداری کا مظاہرہ کرنا ہوگا، شہری کورونا ویکسی نیشن مہم میں حکومت کا ساتھ دیں، پنجاب حکومت کی جانب سے عوام کی زندگیوں کےتحفظ کیلئےہرضروری اقدام اٹھایا جائے گا۔