پشاور: فورسز کی کارروائی میں داعش کے 3 دہشت گرد ہلاک

?️ 20 دسمبر 2021

پشاور(سچ خبریں) صوبہ خیبر پختونخواہ کے دارالحکومت پشاور میں پولیس اور محکمہ انسداد دہشت گردی (سی ٹی ڈی) نے  اہم  کارروائی کرتے ہوئے داعش کے 3 دہشت گرد ہلاک  کر دئے ہیں۔آپریشن کے دوران دہشت گردوں نے پولیس پارٹی پر اندھا دھند فائرنگ کی۔

تفصیلات کے مطابق پشاور میں تھانہ فقیر آباد کی حدود میں پولیس اور محکمہ انسداد دہشت گردی (سی ٹی ڈی) نے مشترکہ آپریشن کیا، آپریشن کے دوران دہشت گردوں نے پولیس پارٹی پر اندھا دھند فائرنگ کی۔سی ٹی ڈی اور پولیس کی جوابی فائرنگ سے 3 دہشت گرد ہلاک ہوگئے۔

پولیس کا کہنا ہے کہ تینوں دہشت گرد ٹارگٹ کلنگ اور دیگر سنگین مقدمات میں مطلوب تھے، دہشت گرد رنگ روڈ قبرستان میں واردات کی غرض سے موجود تھے۔پولیس کے مطابق ہلاک ملزمان دہشت گردی کی کارروائیوں میں ملوث تھے، آپریشن کے دوران ملزمان کے قبضے سے جدید خود کار اسلحہ اور مختلف دستاویزات برآمد ہوئے۔

کیپٹل سٹی پولیس آفیسر (سی سی پی او) نے بعد ازاں میڈیا کو بتایا کہ پشاور میں ہلاک دہشت گردوں کا تعلق داعش سے تھا، ہلاک ملزمان میں ایک کمانڈر حیات تھا جو پشاور داعش کا انچارج تھا۔سی سی پی او کے مطابق مرکزی کمانڈر سلیمان تھا جس کا تعلق باجوڑ سے تھا، تیسرا دہشت گرد افغانی تھا۔

سی سی پی او کا کہن ا ہے کہ 2 پولیس اہلکاروں اور سکھ شہری ستنام سنگھ کے قتل میں داعش نیٹ ورک ملوث تھا جکس میں مذکورہ ملزمان بھی شامل تھے، سنہ 2017 میں پشاور میں داعش کا ہیڈ کوارٹر بھی پکڑا گیا تھا۔انہوں نے بتایا کہ گزشتہ رات مقابلے میں 2 دہشت گرد فرار بھی ہوگئے۔