وزیر خارجہ نے بھارت سے کسی قسم کے مذاکرات کی تردید کر دی

🗓️ 25 اپریل 2021

استنبول(سچ خبریں)متحدہ عرب امارات کے دورے پر یہ خبریں سامنے آ رہی تھیں کہ وہاں  پاک بھارت بات چیت ہو سکتی ہے  تاہم وزیر خارجہ شاہ محمود قریشی نے متحدہ عرب امارات کے ذریعے بھارت کے ساتھ کسی بھی قسم کی بات چیت کی تردید کی ہے۔

تفصیلات کے مطابق ترک ٹی وی کو  انٹرویو میں شاہ محمود قریشی کا کہنا تھا واضح کرنا چاہتا ہوں کہ حالیہ دنوں میں پاکستان اور بھارت کے درمیان کسی بھی قسم کے مذاکرات نہیں ہوئے اور نا ہی یو اے ای نے اس سلسلے میں کوئی سہولت کاری کی ہے۔

وزیر خارجہ کا یہ بھی کہنا تھا کہ انہوں سے اس سے متعلق خبریں دیکھی ہیں لیکن اس میں کوئی صداقت نہیں ہے۔اس سے پہلے واشنگٹن میں یو اے ای کے سفیر  یوسف العتیبہ نے پاک بھارت بات چیت کے لیے معاونت کا دعویٰ کیا تھا۔یوسف العتیبہ کا کہنا تھا کہ مقبوضہ کشمیر کے معاملے پر  دونوں ممالک میں کشیدگی کم کرنے میں یو اے ای کا کردار  رہا ہے۔

وزیر خارجہ نے کہا کہ ہم اس وقت کوئی امن مذاکرات نہیں کر رہے ہیں اور متحدہ عرب امارات کسی بھی طرح کے سہولت کار کا کردار ادا نہیں کررہا۔شاہ محمود قریشی نے کہا کہ انہوں نے ثالثی کے کردار کے بارے میں کہانیاں دیکھی ہیں لیکن ایسا ہو نہیں رہا۔

وزیر خارجہ نے مزید کہا کہ متحدہ عرب امارات ایک دوست ملک ہے اور اس کے پاکستان اور ہندوستان کے ساتھ اچھے تعلقات ہیں، تمام دوست ممالک مستقل یہ کہتے رہے ہیں کہ ایٹمی طاقت کے حامل دونوں ملکوں کو جنگ کی راہ نہیں اپنانی چاہیے اور مسائل کے حل کے لیے آگے بڑھنے کا بہترین طریقہ مذاکرات ہیں۔