وزیر اعلیٰ پنجاب نے اتحاد امت کو وقت کی اہم ضرورت قرار دیا

?️ 8 اگست 2021

لاہور (سچ خبریں) وزیر اعلیٰ پنجاب عثمان بزدار نے اتحاد بین المسلمین کے موضوع پر گفتگو کرتے ہوئے  کہا کہ اتحاد امت وقت کی اہم ضرروت ہے،  اختلافات بھلا کر ایک پلیٹ فام پر جمع ہوکر وطن کا قرض اتار سکتے ہیں سب کو ایک دوسرے کے مذہبی جذبات کا احترام کرنا چاہیے۔

وزیر اعلیٰ پنجاب سردار عثمان بزدار نے ان خیالات کا اظہار اتحادبین المسلمین کمیٹی کے اجلاس سے خطاب کیا، اجلاس کے دوران عثمان بزدار نے رحیم یار خان میں مندر پر حملے کی شدید الفاظ میں مذمت کی۔وزیراعلیٰ پنجاب نے اتحاد امت کو وقت کی اہم ضرورت قرار دیتے ہوئے کہا کہ علمائے کرام اور مشائخ عظام نے ہر موقع پر قوم کی رہنمائی کی ہے اسی لیے یکجہتی اور مذہبی رواداری کے فروغ میں علما کا کردار لائق تحسین ہے۔

عثمان بزدار نے کہا کہ مذہبی ہم آہنگی کے فروغ میں علما کرام کے کردار کو فراموش نہیں کیا جاسکتا اور ساتھ ہی کرونا ایس او پیز سے متعلق بھی آپ نے اپنی ذمہ داریاں بطریق احسن ادا کیں۔انہوں نے کہا کہ حکومت علما کرام کی خدمات کی قدر کرتی ہے، اختلافات بھلاکر ایک پلیٹ فام پر یکجا ہوکر وطن عزیز کا قرض اتار سکتے ہیں۔

وزیراعلیٰ پنجاب نے کہا کہ سب کو ایک دوسرے کے مذہبی جذبات کا احترام کرنا چاہیے اور پرامن فضا کو یقینی بنانے کےلیے سب کو مثبت کردار ادا کرنا چاہیے کیوں کہ رواداری کی فضا قائم کرکے ہی دشمن کے ناپاک عزائم کو ناکام بنایا جاسکتا ہے۔اس موقع پر مولانا طاہر اشرفی، زبیر احمد ظہیر، راغب نعیمی، مولانا عبدالخبیر آزاد اور پیر سید سعید الحسن شاہ بھی موجود تھے۔