وزیراعظم کی تاجک ہم منصب سے ملاقات، دوطرفہ تعلقات پر تبادلہ خیال

?️ 16 ستمبر 2021

دوشنبے (سچ خبریں) وزیراعظم عمران خان نے تاجک ہم منصب سے ملاقات کی جس میں دو طرفہ تعلقات اور خطے سمیت افغانستان کی صورتحال پر تبادلہ خیال کیا گیا۔اس سے پہلے وزیر اعظم اپنے وفد کے ہمراہ  تاجکستان پہنچے جہاں تاجک وزیر اعظم نے قاہر رسول زادہ نے ان کا استقبال کیا۔

تفصیلات کے مطابق وزیراعظم عمران خان کی تاجک ہم منصب سے ملاقات ہوئی ، ملاقات میں دو طرفہ تعلقات اور خطے کی صورتحال پر گفتگو کی گئی اور افغانستان کی صورتحال پر بھی تبادلہ خیال کیا گیا۔

وزیر اعظم کچھ دیر بعد دوشنبے میں پاکستان تاجکستان بزنس فورم میں شرکت کرنے کے ساتھ فورم سےخطاب بھی کریں گے ، بزنس فورم پاکستان اور تاجکستان میں تجارت بڑھانے سےمتعلق اہمیت رکھتا ہے۔

وزارت تجارت،سرمایہ کاری بورڈ ، ٹریڈ ڈیولپمنٹ اتھارٹی فورم منعقدکررہےہیں ، فورم میں 67 پاکستانی جبکہ 150 تاجک کمپنیاں شرکت کررہی ہیں ، کمپنیوں کا تعلق ٹیکسٹائل، چمڑے ، دواسازی،زراعت،معدنیات، سیاحت سے ہیں۔

اس سے قبل وزیراعظم عمران خان 2روزہ دورے پر تاجکستان پہنچے تو تاجک وزیراعظم قاہر رسول زادہ نے عمران خان کا استقبال کیا، وفاقی وزرا شاہ محمودقریشی،فوادچوہدری،علی زیدی ، مشیر سلامتی معیدیوسف، مشیر تجارت عبدالرزاق داؤد وزیراعظم کے ہمراہ ہیں۔دورہ تاجکستان کے دوران وزیرِ اعظم ایران، قازقستان ، بیلاروس اور ازبکستان کے صدور سے ملاقاتیں کریں گے اور تاجک کے صدر سےملاقات کےلیے صدارتی محل بھی جائیں گے۔