اسلام آباد(سچ خبریں) وفاقی وزیر اطلاعات ونشریات فواد چوہدری اور کیوبا کے سفیر زینر جاویر کے درمیان اہم ملاقات ہوئی جس میں دونوں رہنماؤں کے درمیان باہمی دلچسپی کے امور پر تبادلہ خیال کیا گیا۔وفاقی وزیر کا کہنا تھا کہ پاکستان اور کیوبا میں شراکت کے وسیع تر امکانات ہیں۔
تفصیلات کے مطابق ملاقات کے دوران دونوں رہنماؤں(فواد چوہدری اور زینر جاویر) نے پاکستان اور کیوبا کے درمیان مفاہمت کی یادداشت پر دستخط کیے۔ بعد ازاں میڈیا سے گفتگو کرتے ہوئے وزیر کا کہنا تھا کہ پاکستان اور کیوبا میں شراکت کے وسیع تر امکانات ہیں، افغانستان سے غیر ملکیوں کے انخلا میں پاکستان کی کوششوں کو دنیا نے سراہا۔
فوادچوہدری نے کہا کہ کوشش کر رہے ہیں کہ افغانستان میں انسانی المیہ جنم نہ لے، عالمی برادری سےملکر افغانستان کی انسانی ہمدردی کی بنیاد پرمدد کے خواہاں ہیں۔دریں اثنا کیوبا کے سفیر زینر جاویر کا کہنا تھا کہ کابل سے غیر ملکیوں کے انخلا میں مدد کرنے پر پاکستان کے شکر گزار ہیں، افغان عوام کے لیے خوراک اور ادویات کا سلسلہ شروع کرنا قابل ستائش ہے۔
ملاقات کے دوران وفاقی وزیر اور سفیرِ کیوبا نے دونوں ممالک کے درمیان بہترین تعلقات پر روشنی بھی ڈالی اور مستقبل کے حوالے سے بات چیت کی۔رہنماؤں نے عزم ظاہر کیا کہ مشترکہ اور باہمی دلچسپی کے امور پر تعاون جاری رکھیں گے۔