امریکی وزیر خزانہ کا ایران کے خلاف امریکی معاشی مہم کامیاب ہونے کا دعوی

?️ 29 اکتوبر 2026

سچ خبریں:امریکی وزیر خزانہ اسکاٹ بیسنٹ نے دعویٰ کیا ہے کہ ایران کو عالمی سطح پر معاشی طور پر تنہا کرنے کی واشنگٹن کی مسلسل کوششوں سے اس کی مالی صلاحیت متاثر ہوئی ہے اور علاقائی اتحادیوں کی معاونت کے لیے اس کے وسائل میں کمی آ رہی ہے۔

اسپوٹنک نیوز ایجسی کی رپورٹ کے مطابق، امریکی وزیر خزانہ اسکاٹ بیسنٹ نے دعویٰ کیا ہے کہ ایران کو معاشی طور پر الگ تھلگ کرنے کی امریکی کوششیں انتہائی کامیاب رہی ہیں۔ رپورٹ کے مطابق، واشنگٹن کے حکام وسط مدتی انتخابات سے قبل ایران کے خلاف امریکی اقدامات اور پابندیوں کا جواز پیش کرنے کی کوشش کر رہے ہیں۔

بیسنٹ نے دعویٰ کیا کہ ایران اب ڈالر تک رسائی حاصل کرنے کے قابل نہیں رہا اور خطے میں اپنے اتحادیوں کی مالی معاونت کرنے کی اس کی صلاحیت بھی کم ہوتی جا رہی ہے۔

امریکی وزیر خزانہ نے پیر کے روز یہ دعویٰ بھی کیا تھا کہ سمندر میں ایران کا کوئی تیل بردار جہاز موجود نہیں ہے اور ممکن ہے کہ ایران میں تیل کی دریافت کے بعد یہ پہلی مرتبہ ہوا ہو۔

یہ بیانات ایسے وقت میں سامنے آئے ہیں جب امریکی صدر ڈونلڈ ٹرمپ نے جمعرات کے روز اعتراف کیا کہ ایران کو طبی امداد اور دیگر ضروری اشیا کی ضرورت ہے۔

 ٹرمپ نے وال اسٹریٹ جرنل کی اس رپورٹ کو بھی مسترد کر دیا، جس میں دعویٰ کیا گیا تھا کہ امریکی نائب صدر جے ڈی وینس نے ایران کی قومی سلامتی کونسل کے سیکریٹری میجر جنرل محسن رضائی کو امن مذاکرات دوبارہ شروع کرنے کے لیے ایک خفیہ پیغام بھیجا تھا۔

امریکہ اور اسرائیل نے 9 اسفند 1404، یعنی فروری 2026ء کے اواخر میں ایران پر حملے شروع کیے، جس کے جواب میں تہران نے بھی حملے کیے۔

دونوں فریق جون 2026ء کے وسط میں لڑائی روکنے کے لیے ایک مفاہمتی یادداشت پر متفق ہوئے، تاہم بعد میں امریکہ کی جانب سے وعدوں کی خلاف ورزی کے الزامات کے بعد جوابی حملے دوبارہ شروع ہو گئے۔

براہ راست لڑائی رکنے کے باوجود تنازع اب تک کسی حتمی معاہدے کے بغیر جاری ہے، جبکہ واشنگٹن ایران پر معاشی دباؤ برقرار رکھنے کی کوشش کر رہا ہے۔

ایران کے خلاف جنگ اور بڑھتی ہوئی کشیدگی نے آبنائے ہرمز میں بحری آمدورفت کو بھی متاثر کیا ہے، جس کے نتیجے میں دنیا کے متعدد ممالک میں ایندھن اور صنعتی اشیا کی قیمتوں میں اضافہ ہوا ہے۔