فتنہ الہندوستان کے خاتمے تک چین سے نہیں بیٹھیں گے۔ وفاقی وزیر اطلاعات

?️ 23 مئی 2025

اسلام آباد (سچ خبریں) وفاقی وزیر اطلاعات و نشریات عطاء تارڑ نے کہا ہے کہ فتنہ الہندوستان کے خاتمے تک چین سے نہیں بیٹھیں گے۔

تفصیلات کے مطابق وفاقی وزیر عطاء تارڑ نے کہا ہے کہ خضدار واقعہ ایک بہت بزدلانہ حملہ تھا، ہماری قوم وہ واحد قوم ہے جس کے بچوں کی قربانی بھی سنہری حروف میں لکھی جائے گی، بلوچستان میں دہشتگردوں کو ہم نے فتنہ الہندوستان کا نام دیا ہے، فتنہ الہندوستان مکمل طور پر اس علاقے میں سرگرم تھا۔

ذرائع کے مطابق انہوں نے کہا کہ پچھلے ایک سال کے آپریشنز کے بعد اب یہ دہشتگرد ہارڈ ٹارگٹ سے سوفٹ ٹارگٹ کی طرف جا رہے ہیں، ایک سال کے اندر بہت کامیابیاں ملی ہیں، جعفر ایکسپریس کا جو واقعہ ہوا اس میں بھی بڑی مہارت کے ساتھ ڈیل کیا گیا۔

وفاقی وزیر کا کہنا تھا کہ یہ صورتحال پہلے سے جاری ہے جس میں ہماری فورسز پہلے سے ہی مصروف ہیں، اس واقعہ کے بعد ہمارا عزم اور بھی مضبوط ہوگیا ہے، جب تک ہم فتنہ الہندوستان کو یہاں سے بالکل ختم نہیں کر دیتے ہم چین سے نہیں بیٹھیں گے۔