عدلیہ کے حکم کی پابندی کریں گے مگر بیرونی سازش کو نظراندازنہیں کیا جاسکتا.سپیکر اسدقیصر

?️ 9 اپریل 2022

اسلام آباد(سچ خبریں) قومی اسمبلی کا اہم ترین اجلاس شروع ہوگیا ہے قائدحزب اختلاف شہبازشریف نے کہا کہ تحریک عدم اعتماد کو سپریم کورٹ کے حکم کے مطابق کاروائی مکمل کی جائے جس پر سپیکر اسدقیصر نے کہا کہ ہم بھی سپریم کورٹ کے حکم پر پابندی کریں گے مگر بیرونی سازش کو نظراندازنہیں کیا جاسکتا.

وزیرخارجہ شاہ محمود قریشی نے ماضی کا حوالہ دیتے ہوئے کہا کہ ایسا بھی ہوتا رہا ہے کہ جو چیزمانگی بھی نہیں گئی تھی مشرف کو وہ بھی دی گئی یعنی انہیں آئین میں ترمیم کا حق تک دیاگیا انہوں نے کہا کہ ہم نے سپریم کورٹ کے فیصلے کو تسلیم کیا اور اسی فیصلے کے مطابق ہی کاروائی آگے بڑھائی جائے گی۔

وزیرخارجہ شاہ محمود قریشی نے کہا کہ چھٹی کے دن سپریم کورٹ کھولا گیا خصوصی طور پر اس کیس کے لیے کھولا گیا انہوں نے کہا کہ اپوزیشن نئے انتخابات کا مطالبہ کرتی آئی ہے تو وزیراعظم نے سب کو کہا کہ آﺅ عوام میں چلتے ہیں مگر حزب اختلاف کے دوستوں کو معلوم نہیں عوام کے پاس جانے سے کیوں ڈرلگتا ہے؟

انہوں نے کہا قومی سلامتی کونسل کا فورم ملک کا اعلی ترین فورم ہے جہاں اس مراسلہ کو پیش کیا گیا اور قومی سلامتی کونسل نے دوفیصلے کیئے ایک کونسل نے تسلیم کیا کہ یہ ایک ”رجیم تبدیل“کرنے کی سازش ہے ‘اسلام آباد اور واشنگٹن میں احتجاج ریکارڈ کروایا جائے قومی سلامتی کونسل نے یہ بھی کہا کہ معاملے کو پارلیمنٹ کی کمیٹی کے سامنے لے جایا جائے .

انہوں نے کہا پاکستان کی تاریخ آئین شکنی سے بھری ہوئی ہے وزیرخارجہ کی گفتگو جاری تھی کہ اپوزیشن بنچوں سے خواتین کی جانب سے شورشرابہ شروع ہوگیا جس پر سپیکر قومی اسمبلی اسد قیصر نے اجلاس کو ساڑھے بارہ بجے تک ملتوی کردیا.