🗓️ 13 مئی 2025

اسلام آباد: (سچ خبریں) صدر مملکت آصف علی زرداری اور وزیر اعظم شہباز شریف نے شہدا معرکہ حق کو بھرپور خراج عقیدت پیش کیا ہے۔

ڈان نیوز کے مطابق صدر مملکت آصف علی زرداری نے ملکی سلامتی کی خاطر جان کا نذرانہ پیش کرنے پر قوم افواج پاکستان کو سلام پیش کرتے ہوئے کہا کہ آپریشن ’بنیان مرصوص‘ سے بہادر افواج نے دشمن کا غرور خاک میں ملادیا۔

صدر مملکت نے بھارتی حملوں میں شہید ہونے والوں کو خراج عقیدت پیش کرتے ہوئے کہا کہ اپنے شہدا کی قربانیوں پر فخر ہے، پاکستانی قوم اور مسلح افواج بھارتی جارحیت کے خلاف سیسہ پلائی دیوار کی طرح کھڑے رہے۔

انہوں نے کہا کہ پاکستان کی بہادر افواج نے قوم اور مکی سالمیت کا کامیابی سے دفاع کیا، بھارت کی صریح جارحیت نے پوری پاکستانی قوم کو مزید متحد اور مضبوط کردیا۔

صدر زردرای نے کہا کہ پاکستانی قوم اور بہادر افواج کسی بھی جارحیت کا جواب دینے کے لیے ہر وقت تیار ہیں، ملکی سلامتی و خود مختاری پر ہونے والے ہر حملے کا منہ توڑ جواب دیں گے۔

صدر مملکت نے بھارتی حملوں کے دوران قیمتی جانی نقصان پر گہرے دکھ اور رنج کا اظہار کیا، شہدا کے لواحقین کے ساتھ تعزیت کی اور صبر جمیل کی دعا کی۔

شہدا کے اہلخانہ کی کفالت ریاست کرے گی، شہباز شریف

وزیراعظم شہباز شریف نے معرکہ حق کے شہدا کو بھرپور خراج عقیدت پیش کرتے ہوئے کہا ہے کہ شہدا نے پاکستان کی خود مختاری پر کوئی آنچ نہیں آنے دی، شہدائے وطن کو بھولے ہیں نہ بھولیں گے۔

ڈان نیوز کے مطابق وزیراعظم شہباز شریف نے کہا کہ افواج پاکستان نے وطن کی حفاظت کا وعدہ پورا کیا، پوری قوم کو اپنے شہدا اور ان کے اہل خانہ پر فخر ہے، بہادر سپوتوں کی قربانیوں کو قوم کبھی فراموش نہیں کرے گی۔

انہوں نے کہا کہ شہدا کے اہل خانہ کو تنہا نہیں چھوڑیں گے، شہدا کے اہل خانہ کی کفالت ریاست کرے گی، ہم پر امن قوم ہیں اور کسی بھی جارحیت کا جواب دینا جانتے ہیں۔

یاد رہے کہ گزشتہ روز وزیراعظم شہباز شریف نے معرکہ حق کے دوران شہید ہونے والوں کے لیے شہدا پیکیج کا اعلان کیا تھا۔

بیان میں کہا گیا تھا کہ پاک افواج کے شہدا کے ورثا کو رینک کے حساب ایک کروڑ روپے سے ایک کروڑ 80 لاکھ روپے رقم دی جائے گی، اسی طرح پاک افواج کے شہدا کے ورثا کو گھر کی سہولت کے لیے رینک کے حساب سے ایک کروڑ 90 لاکھ روپے سے 4 کروڑ 20 لاکھ روپے دیے جائیں گے۔

پاک افواج کے شہدا کی ریٹائرمنٹ کی تاریخ تک ان کی مکمل تنخواہ بمعہ الاؤنسز جاری رہیں گی، پاک افواج کے شہدا کے بچوں کو گریجویشن تک مفت تعلیم دی جائے گی۔

پیکیج کے مطابق پاک افواج کے ہر شہید کی ایک بیٹی کی شادی کے لیے 10 لاکھ روپے کی میرج گرانٹ دی جائے گی۔