سی پیک کیلئے پاکستان کو 24 ارب 70 کروڑ ڈالر مل چکے، وزارت منصوبہ بندی

?️ 11 دسمبر 2024

اسلام آباد: (سچ خبریں) وزارت منصوبہ بندی نے بتایا ہے کہ سی پیک منصوبوں کے تحت اب تک 24 ارب 70 کروڑ ڈالر سے زائد رقم موصول ہوئی، اس رقم سے اب تک 43 منصوبے مکمل کیے جا چکے ہیں۔

ڈان نیوز کے مطابق پاکستان چین اقتصادی راہداری ( سی پیک) کے تحت پاکستان کو ملنے والی رقوم کی تفصیلات قومی اسمبلی میں پیش کردی گئیں۔

سی پیک کے تحت بلوچستان اور خیبرپختونخوا میں 2،2 جبکہ پنجاب اور اسلام آباد میں ایک ایک منصوبہ تکمیل کے مراحل میں ہے۔

وزارت منصوبہ بندی نے مزید بتایا کہ پاک چین اقتصادی راہداری کے تحت اس وقت 70 کروڑ ڈالر سے زائد 8 منصوبے زیر تکمیل ہیں۔

واضح رہے کہ سی پیک ایک ترقیاتی منصوبہ ہے جو پاکستان اور چین کے درمیان تجارتی اور اقتصادی روابط کو فروغ دینے کے لیے بنایا گیا ہے۔

اس منصوبے کا مقصد چین کے جنوب مغربی صوبے سنکیانگ کو پاکستان کے گوادر پورٹ سے بذریعہ سڑک منسلک کرنا ہے، اس راہداری کے ذریعے چین مشرقِ وسطیٰ، افریقہ اور یورپ کی منڈیوں تک رسائی چاہتا ہے۔

سی پیک کا پہلا مرحلہ مسلم لیگ ن کے تیسرے دور حکومت میں وزیراعظم شریف کی قیادت میں شروع کیا گیا تھا جس کے تحت سی پیک کے روٹ پر کئی موٹرویز اور پل تعمیر کیے گئے تھے، رواں سال حکومت نے سی پیک کا دوسرا مرحلہ شرو ع کرنے کا اعلان کیا تھا تاہم اس کی تفصیلات سامنے نہیں آسکی ہیں۔