تحریک انصاف کے اعلی حکام کا اجلاس گورنرہائوس کراچی میں منعقد ہو

?️ 11 دسمبر 2021

کراچی (سچ خبریں) وزیراعظم عمران خان کی زیرصدارت پاکستان تحریک انصاف کے علاقائی صدور اور جنرل سیکریٹریز کا اجلاس گورنرہائوس کراچی میں منعقد ہوا،گورنر ہائوس میں سندھ کے معاملات پر ہونے والے اجلاس میں گورنر سندھ عمران اسماعیل، سندھ اسمبلی میں اپوزیشن لیڈر حلیم عادل شیخ اور وزیراعظم کے معاون خصوصی برائے امور سندھ ارباب غلام رحیم شریک ہوئے،ذرائع کا کہنا ہے کہ اس دوران تنظیمی امورپرحلیم عادل شیخ اور ارباب غلام رحیم میں تلخ جملوں کا تبادلہ ہوا۔
اجلاس میں ارباب غلام رحیم نے شکوہ کیا کہ ہمارے لوگوں کے خلاف انتقامی کارروائیاں ہورہی ہیں، گورنر سندھ اپنا کردار ادا نہیں کرتے تاہم ترجمان حلیم عادل شیخ نے اس امرکی سختی سے تردید کی ہے۔

وزیراعظم کے زیرصدارت اجلاس میں صوبے کی مجموعی سیاسی صورت حال اور ترقیاتی اسکیموں سمیت دیگر امور پر تبادلہ خیال کیا گیا۔وزیر اعظم نے حکومت سندھ پر زور دیا کہ وہ وفاقی حکومت کے تمام سماجی و اقتصادی ترقی کی اسکیموں بشمول کامیاب پاکستان، احساس کارڈ، احساس راشن رعایت پروگرام، صحت کارڈ اور کسان کارڈ میں بھرپور حصہ لے۔

وزیر اعظم نے کہا کہ محض سیاسی وجوہات کی بنا پر صوبہ سندھ کے عوام کو وفاقی حکومت کے ترقیاتی سکیموں کے ثمرات سے محروم نہیں رکھا جاسکتا۔ وفاقی حکومت کے تمام منصوبے عوامی فلاح کے لیے ہیں۔

دوسری جانب ترجمان حلیم عادل شیخ کا کہنا ہے کہ اپوزیشن لیڈر سندھ اسمبلی حلیم عادل شیخ اور ارباب غلام رحیم کی تلخ کلامی کے حوالے سے خبروں میں صداقت نہیں ہے،وزیراعظم کی زیرصدارت سندھ کی تنظیمی صورتحال پر معمول کا اجلاس تھا،اجلاس میں تمام شرکا نے کھل کر اپنے خیالات کا اظہار کیا،اجلاس میں کسی قسم کی کوئی بحث یا گرما گرمی نہیں ہوئی،پی پی کے ڈس انفارمیشن سیل کی جانب سے ایسی خبریں پھیلائی جارہی ہیں،تحریک انصاف سندھ مضبوط اور متحد رہ کر سندھ کے سیاسی مافیاز سے مقابلا کررہی ہے۔