افغانستان بھی بھارت کی پراکسی بن گیا، افغانیوں کو واپس جانا ہوگا۔ خواجہ آصف

?️ 17 اکتوبر 2025

اسلام آباد (سچ خبریں) وزیر دفاع خواجہ محمد آصف نے کہا کہ افغانستان بھی بھارت کی پراکسی بن گیا ہے، پاک سر زمین پر بیٹھے تمام افغانیوں کو اپنے وطن جانا ہوگا۔

سماجی رابطے کی سائٹ ایکس پر اپنے پیغام میں وزیر دفاع خواجہ محمد آصف کا کہنا تھا کہ کابل کے حکمران بھارت کی گود میں بیٹھ کر سازشیں کر رہے ہیں، بھارت، افغانستان اور فتنہ الخوارج نے مل کر پاکستان پر دہشتگردی مسلط کی ہے۔

وزیر دفاع نے کہا کہ پاکستان اب کابل کے ساتھ تعلقات کا ماضی کی طرح متحمل نہیں ہوسکتا، کابل میں اب ان کی اپنی حکومت ہے، اسلامی انقلاب آئے 5 سال ہوچکے، افغانیوں کو پاکستان کے ساتھ ہمسایوں کی طرح رہنا ہوگا۔

خواجہ آصف نے کہا کہ ہماری سر زمین اور وسائل پاکستان کے 25 کروڑ عوام کی ملکیت ہیں، دہائیوں سے جاری زبردستی کی مہمان نوازی کے خاتمے کا وقت آگیا، خوددار قومیں بیگانی سر زمین اور وسائل پر نہیں پلتیں۔

انہوں نے کہا کہ طالبان کے 2021 سے اقتدار میں آنے کے بعد سے لے کر اب تک پاکستان میں دہشت گردی کے 10 ہزار 347 واقعات ہوئے، اب احتجاجی مراسلے یا امن کی اپیلیں نہیں ہوں گی، وفد بھی کابل نہیں جائیں گے، دہشت گردی کا منبہ جہاں بھی ہوگا، بھاری قیمت ادا کرنا ہوگی، پاکستان ہمیشہ زندہ باد۔