لاہور (سچ خبریں)گورنر پنجاب چوہدری محمد سرور نے مسجد اقصی پر اسرائیل کی جانب سے حملے پر شدید برہمی کا اظہار کرتے ہوئے کہا کہ مسجدِ اقصیٰ پرحملہ بدترین اسرائیلی دہشت گردی ہے اور اقوام متحدہ کی اسرائیلی دہشت گردی پر خاموشی نہایت شرمناک ہے۔
چوہدری محمد سرور کی جانب سے مائیکرو بلاگنگ ویب سائٹ ٹوئٹر پر مسجدِ اقصیٰ پر اسرائیلی فوجیوں کی فائرنگ کی ویڈیو شیئر کی گئی ہے۔چوہدری محمد سرور نے سوشل میڈیا پر اپنے بیان میں کہا ہے کہ جب تک کشمیر اور فلسطین کا مسئلہ حل نہیں ہوگا دنیا میں امن قائم نہیں ہوگا۔
انہوں نے مزید کہا ہے کہ اقوام متحدہ کی اسرائیلی دہشت گردی پر خاموشی شرمناک ہے۔گور نر پنجاب چوہدری محمد سرور کا یہ بھی کہنا ہے کہ امتِ مسلمہ کو بھی اسرائیلی دہشت گردی کے خلاف دو ٹوک پالیسی بنانا ہوگی۔
یاد رہے کہ ذرائع کے مطابق مسجد اقصی میں نماز پڑھتے مسلمانوں پر قابض اسرائیلی فورسز کی طرف سے آنسو گیس کی شیلنگ کی گئی اور دستی بموں سے حملہ کیا گیا۔اسرائیلی فوجی جوتوں سمیت مسجد اقصی میں گھس گئے اور مسجد اقصی کے باب الرحمہ سے مسجد کے اندر نمازیوں کے درمیان دستی بم پھینکے گئے اور آنسو گیس کی شدید شیلنگ کی گئی۔
اسرائیلی سیکیورٹی فورسز نے نمازیوں پر دستی بموں اور ربڑ کی گولیوں سے حملہ کیا،اس موقع پر کئی نمازی زخمی بھی ہوئے ہیں۔اسرائیلی فورسز کے مسجد اقصیٰ پر حملے کے وقت بڑی تعداد میں خواتین اور بچے بھی موجود ہیں جبکہ کئی بچوں کے بھی زخمی ہونے کی متضاد اطلاعات موصول ہو رہی ہیں ۔
