ٹک ٹاک نے پاکستانی صارفین کے لیے بڑی سہولت متعارف کرا دی

?️ 18 ستمبر 2021

بیجنگ(سچ خبریں) مختصر ویڈیو شیئرنگ ایپلیکیشن ٹک ٹاک نے اہم قدم اٹھاتے ہوئے پاکستانی صارفین کے لیے بڑی سہولت متعارف کرادی۔ پاکستانی صارفین کے لیے سیفٹی سینٹر میں اردو زبان بھی شامل کرلی گئی ہے اب والدین اور سرپرست بچوں پر خصوصی نظر رکھ سکیں گے۔

ٹک ٹاک کی جانب سے جاری اعلامیے میں بتایا گیا ہے کہ پاکستانی صارفین کے لیے سیفٹی سینٹر میں اردو زبان بھی شامل کرلی گئی ہے، جہاں کمپنی پالیسیز اور قواعد و ضوابط آسان اردو میں واضح نظر آرہے ہیں۔

خیال رہے کہ سیفٹی سینٹر کے ذریعے صارفین کو پلیٹ فارم کے استعمال کی پالیسیز، ٹولز اور مصنوعات کی آگاہی کے ساتھ حفاظتی اقدامات کے حوالے سے آگاہ کیا جاتا ہے۔ سیفٹی سینٹر کی مدد سے اب والدین اور سرپرست بچوں پر خصوصی نظر رکھ سکیں گے اور انہیں اس بات کا بھی علم ہوگا کہ بچہ کس قسم کی ویڈیوز کو تلاش کررہا یا دلچسپی لے رہا ہے۔

واضح رہے کہ اس کے ذریعے قارئین کو ٹک ٹاک سیفٹی اور حفاظت کے حوالے سے رہنمائی دی جائے گی۔سیفٹی اور پرائیوسی کو کنٹرول کیا جاسکے گا۔اس کے ذریعے خودکشی کے رجحان کو ختم کرنے اور صارفین کو کرونا کے حوالے سے آگاہی فراہم کی جائے گی۔