فیس بک نے صارفین کے لئے اہم فیچر متعارف کرا دیا

🗓️ 11 دسمبر 2021

نیویارک (سچ خبریں) سماجی رابطے کی ویب سائٹ فیس بک نے صارفین کے لئے اہم فیچر متعارف کرادیا ، فیس بک نے نئے اور مشہور تخلیق کاروں کے لیے پروفیشنل پروفائل کی سہولت لانچ کردی ہے تاکہ وہ اپنے مداح اور شائقین خود تخلیق کرسکیں۔اس کے ذریعہ ہر شعبے سے وابستہ افراد اپنے ہم مزاج مداحوں سے جڑ سکیں گے۔

اس مقصد کے لیے ایپ میں پروفیشنل موڈ کا اضافہ کیا گیا ہے جس کی معلومات کری ایٹر پیجز میں جمع ہوجاتی ہیں، اس طرح ہر شعبے سے وابستہ افراد اپنے ہم مزاج مداحوں اور لوگوں سے جڑ سکیں گے۔فیس بک نے ٹریکنگ ٹولز کو بطورِ خاص تیار کیا ہے جن کی بدولت لوگ اپنے پسندیدہ فنکار یا تخلیق کار کو فوری طور پر تلاش بھی کر سکیں گے۔

اس طرح مختلف شعبوں سے وابستہ افراد بھی فیس بک پروفائل کی طرح اپنے آپ کو آگے بڑھا سکیں گے، دلچسپ بات یہ ہے کہ پروفیشنل موڈ میں جانے کے بعد صارف اشتہاراتی آمدنی وغیرہ کے بھی اہل ہوسکیں گے، یوں نئی پیشکش کی بدولت لوگ اپنا دائرہ وسیع کرسکیں گے۔

اگر آپ بھی کسی فن کے ماہر ہیں اور اب بھی اپنی شاعری، گلوکاری، موسیقی اور تحریر وغیرہ پوسٹ کرتے رہتے ہیں تو آپ پروفیشنل موڈ میں جاسکتے ہیں۔ اس کا ایک اور فائدہ یہ ہے کہ کوئی بھی پیشہ وارانہ ماہر تیزی سے رقم بھی بنا سکتے ہیں اور ان کےلیے مونی ٹائزیشن آسان بنادی گئی ہے۔فی الحال اسے امریکا میں آزمایا گیا ہے اور اگلے برس تک پوری دنیا میں عام کردیا جائے گا۔

اس دوران فیس بک کے پروفیشنل ماہرین کی ہدایات میں آپ اپنے پیج کو بہتر سے بہتر بناسکتے ہیں، اس پیشکش کا مقصد یہ ہے کہ فیس بک کو ٹک ٹاک کی طرح مقبول بنایا جائے تاکہ لوگ نوجوانوں سے جڑ سکیں۔