آبادی پر قابو پا کر عوام کے معیارِ زندگی کو بہتر بنایا جا سکتا ہے: عثمان بزدار

?️ 11 جولائی 2021

لاہور (سچ خبریں)پنجاب کے وزیرِ اعلیٰ سردار عثمان بزدار کا کہنا ہے کہ بادی پر قابو پا کر عوام کے معیارِ زندگی کو بہتر بنایا جا سکتا ہے۔قدرتی وسائل کے تحفظ کے لیے انسانی آبادی کے سونامی کو روکنا ہو گا اس حوالے سے ہمیں عوام کا تعاون درکار ہے۔

آبادی کے عالمی دن کے موقع پر جاری کیئے گئے ایک بیان میں پنجاب کے وزیرِ اعلیٰ سردار عثمان بزدار نے کہا ہے کہ بڑھتی آبادی کے ساتھ تیزی سے بڑھتے مسائل کرہ ارض پر انسانی بقاء کے لیے خطرہ ہیں۔انہوں نے کہا ہے کہ آبادی میں بے پناہ اضافہ صحت، تعلیم اور روزگارکے مسائل کو ترویج دیتا ہے، یہ دن آبادی اور وسائل میں توازن کی اہمیت کو اجاگر کرتا ہے۔

عثمان بزدار کا مزید کہنا ہے کہ بڑھتی ہوئی آبادی سے متعلق مسائل پر قابو پانے کے لیے عوام کا تعاون ناگزیر ہے۔وزیرِ اعلیٰ پنجاب نے یہ بھی کہا ہے کہ آبادی میں اضافے کے تناسب سے وسائل کا فروغ دنیا بھر میں چیلنج بن چکا ہے، سماج میں بہبودِ آبادی کا شعور بیدار کرنا معاشرے کے ہر فرد کی ذمے داری ہے۔

دوسری جانب سماجی رابطے کی ویب سائٹ ٹوئٹر پر پنجاب کے وزیرِ اعلیٰ سردار عثمان بزدار کی معاونِ خصوصی برائے اطلاعات ڈاکٹر فردوس عاشق اعوان نے عالمی یوم آبادی کے حوالے سے ایک بیان جاری کیا ہے۔انہوں نے کہا ہے کہ آبادی میں اضافہ وسائل میں کمی اور مسائل میں اضافے کاباعث بن رہا ہے، بڑھتی آبادی کے باعث بڑھتے مسائل عوام کی توجہ کے منتظر ہیں۔فردوس عاشق اعوان کا یہ بھی کہنا ہے کہ ہر شہری تک بنیادی سہولتوں کی فراہمی حکومت کی ذمے داری ہے۔