امریکہ نے چین کو دنیا کی سلامتی کے لیئے خطرہ قرار دیتے ہوئے اہم قدم اٹھانے کا اعلان کردیا

🗓️ 25 مارچ 2021

واشنگٹن (سچ خبریں) امریکہ نے چین کو دنیا کی سلامتی کے لیئے خطرہ قرار دیتے ہوئے اہم قدم اٹھانے کا اعلان کردیا ہے اور کہا ہے کہ چین دنیا کی سلامتی کے لیئے خطرہ ہے اس لیئے اب امریکا چین کے خلاف نیٹو کو مزید مضبوط بنائے گا۔

تفصیلات کے مطابق امریکی وزیر خارجہ انتونی بلنکن نے کہا ہے کہ چین کے خلاف نیٹو کو مضبوط کریں گے جبکہ افغانستان سے انخلا کا فیصلہ اتحادیوں کی مشاورت سے کیا جائے گا۔

برسلز میں نیٹو اتحاد کے دو روزہ وزراتی اجلاس کے آخری روز خطاب میں امریکی وزیر خارجہ نے کہا کہ چین کا سخت رویہ اجتماعی خوشحالی اور سیکیورٹی کے لیے خطرہ ہے کسی نیٹو اتحادی کو بیجنگ یا واشنگٹن کا ساتھ دینے پر مجبور نہیں کریں گے۔

انہوں نے کہا کہ چین ایک ارب 34 کروڑ  آبادی والا ملک ہے موسمیاتی تبدیلی اور صحت امور سے متعلق چین کے ساتھ تعلقات ضروری ہیں جبکہ چین کے خلاف نیٹو کو مضبوط کریں گے۔

امریکی وزیر خارجہ کا کہنا تھا کہ افغانستان کے معاملے پر ابھی بات چیت جاری ہے اور ان کے کام کا ایک حصہ اس بارے میں اپنے نیٹو اتحادیوں کی بات سننا اور امریکا کی سوچ ان تک پہنچانا ہے۔

ان کا کہنا تھا کہ امریکہ اپنے اتحاد ازسرِنو تعمیر کرنا چاہتا ہے اور سب سے پہلے اپنے نیٹو اتحادیوں کے ساتھ، ہم اتحاد کی قوت کو بحال کر کے یہ یقینی بنانا چاہتے ہیں کہ یہ آج کے خطرات کے خلاف بھی اتنا ہی مضبوط اور مؤثر ہے جتنا کبھی ماضی میں رہا ہے۔

وزیر خارجہ نے واضح کیا کہ نیٹو اتحادی اور شراکت دار تربیتی مشن ریزولوٹ سپورٹ کی مدد سے افغانستان میں طویل المدتی سلامتی اور استحکام کے لئے پرعزم ہیں ہم یقینی بنائیں گے کہ افغان سرزمین امریکہ یا اس کے اتحادیوں کے خلاف حملے کے لئے دوبارہ کبھی استعمال نہ ہو۔