طالبان نے رمضان المبارک آتے ہی شدید حملے شروع کردیئے، درجنوں افراد ہلاک اور زخمی ہوگئے

🗓️ 15 اپریل 2021

کابل (سچ خبریں) طالبان نے رمضان المبارک آتے ہی افغانستان میں شدید حملے شروع کردیئے ہیں جن کے نتیجے میں درجنوں افراد ہلاک اور زخمی ہوگئے ہیں۔

تفصیلات کے مطابق افغانستان میں رمضان کے پہلے روز طالبان کے مختلف حملوں میں 23 سیکورٹی اہلکار ہلاک اور درجنوں زخمی ہوگئے۔

افغان میڈیا کے مطابق یہ حملے بلخ، بدخشاں، لوگر، بغلان اور تخار صوبے میں کیے گئے، بلخ میں10، بغلان میں 6، بدخشاں اور لوگر میں 3 ،3 جبکہ تخار میں ایک اہلکار مارا گیا، بلخ میں طالبان نے 5 اہلکاروں کو یرغمال بھی بنا لیا۔

افغان صدر اشرف غنی اور قومی مفاہمتی کونسل کے سربراہ عبداللہ عبداللہ نے طالبان سے رمضان میں حملے روکنے کا مطالبہ کیا اور تنازع کے پرامن حل کی ضرورت پر زور دیا ہے۔