شام میں خواتین کی خرید و فروخت کا بازار گرم

سچ خبریں:شام میں الجولانی دہشتگرد گروہ کی پشت پناہی سے خواتین کے اغوا اور ان کی خرید و فروخت کا رجحان بڑھتا جا رہا ہے جبکہ اقلیتوں کے خلاف حملے اور جبر کے واقعات عالمی برادری کے لیے لمحہ فکریہ بن چکے ہیں۔

ایک معروف عربی اخبار نے ایک تشویشناک اور خطرناک رجحان کی نشاندہی کی ہے جو شام میں تیزی سے پھیل رہا ہے، رپورٹ کے مطابق اسرائیلی حملوں اور دہشتگرد گروہوں کی جانب سے اقلیتوں پر مظالم کے ساتھ ساتھ اب خواتین کی خرید و فروخت اور جبری شادیاں ایک نیا المیہ بن چکی ہیں، جو شام میں ایک انتہائی خطرناک باب کا آغاز ثابت ہو سکتا ہے۔

یہ بھی پڑھیں:شام میں بڑھتی ہوئی بدامنی؛ دہشتگردوں کے ہاتھوں خواتین اغوا 

روزنامہ رأی الیوم کے مطابق، شام کے عوام اس وقت اسرائیلی بمباری اور دہشتگرد گروہوں کے اقلیتوں پر حملوں کے ساتھ ساتھ ایک اور صدمہ انگیز حقیقت کا سامنا کر رہے ہیں جس میں خواتین کو اغوا کرکے ان کی تجارت کی جا رہی ہے۔

 رپورٹ کے مطابق الجولانی دہشتگرد گروپ سے منسلک عناصر، نکاحِ جہاد اور خواتین کی خرید و فروخت کے نظریے کو فروغ دے رہے ہیں، جس کے باعث شام کھلے عام غلام منڈی میں تبدیل ہو رہا ہے۔

ایک دلخراش مثال میں، میرا نامی ایک علوی طالبہ کو صوبہ حمص میں اس کے تعلیمی ادارے سے اغوا کیا گیا، اور بعد ازاں اس کی تصاویر ایک نوجوان کے ساتھ نکاح کی حالت میں سامنے آئیں۔

یہ صورتحال اتنی ابتر ہو چکی ہے کہ والدین اپنی بیٹیوں کو اسکول اور یونیورسٹی بھیجنے سے بھی خوف زدہ ہو گئے ہیں، کیونکہ دہشتگرد گروہوں کے قبضے والے علاقوں میں اغوا کی وارداتیں عام ہو گئی ہیں۔

مزید پڑھیں: شام میں داعشی خواتین کی سربراہ امریکی خاتون کے خلاف فرد جرم عائد

علوی اسلامی کونسل نے اقوام متحدہ کو ایک خط لکھ کر اطلاع دی ہے کہ شام میں مزید 60 علوی لڑکیاں اغوا ہو چکی ہیں، جن کا کوئی اتہ پتہ نہیں ہے۔