واشنگٹن (سچ خبریں) امریکی نائب صدر کملا ہیرس کی رہائش گاہ پر بم حملے کی کوشش کی گئی جسے ناکام بنا دیا گیا اور حملہ آور کو گرفتار کرلیا گیا۔
تفصیلات کے مطابق کے مطابق رہایش گاہ کے باہر سے ایک مسلح شخص کو بارودی مواد سے بھری گاڑی کے ساتھ حراست میں لیا گیا، مسلح شخص کے پاس سے رائفل اور شارٹ گن بھی برآمد ہوئی ہے، واقعے کے وقت کملا ہیرس گھر میں جاری مرمتی کام کے باعث موجود نہیں تھیں۔
امریکی میڈیا کا کہنا ہے مشتبہ شخص کی شناخت 31 سالہ پال مورے کے نام سے ہوئی، جو سان اینٹونیو کا رہایشی ہے، اسے خفیہ اداروں کی رپورٹ کے بعد حراست میں لیا گیا۔
دوسری جانب امریکا میں ایشیائی امریکیوں کے خلاف نفرت اور جرائم میں خطرناک حد تک اضافہ ریکارڈ کیا گیاہے، ایک رپورٹ کے مطابق سال بھر میں 3 ہزار 800 واقعات پیش آئے۔
بدھ کے روزاٹلانٹا میں فائرنگ سے ہلاک ہونے والوں میں 6 ایشیائی خواتین بھی شامل تھیں، امریکا میں ایشیائی باشندوں کا اطلاق چینی، کوریائی، فلپائنی، ویتنامی اورجاپانی شہریوں پر کیا جاتا ہے۔
رپورٹ کے مطابق ایشیائی امریکیوں کے خلاف جرائم میں اضافہ کورونا کے پھیلاؤ اور ٹرمپ کی نفرت انگیز تقاریر کے بعد ہوا، ڈونلڈ ٹرمپ کے دور میں سفیدفام بالادستی میں دو گنا اضافہ دیکھا گیا۔
اس سے قبل امریکی خفیہ اداروں نے اپنی رپورٹ میں خبردار کیا تھا کہ ملک کو سب سے بڑا خطرہ داخلی انتہا پسندی سے ہے، مقامی انتہا پسند شہریوں اور حکومت پر حملوں کی منصوبہ بندی کر سکتے ہیں۔
بدھ کے روز جاری کی جانے والی رپورٹ میں کہا گیا کہ یہ منصوبہ بندی انفرادی سطح پر یا چند افراد پر مشتمل گروہوں کی جانب سے ہو سکتی ہے، جو پُرتشدد نظریات رکھتے ہیں، نسل پرست مختلف امور کو وجہ بنا کر عوام کو تشدد پر ابھار رہے ہیں۔
