اسرائیلی فوج کا سلوان علاقے پر حملہ، فلسطینی شہری کا گھر مسمار کردیا

🗓️ 13 جولائی 2021

مقبوضہ بیت المقدس (سچ خبریں) اسرائیلی فوج نے مقبوضہ بیت المقدس میں سلوان محلے میں حملہ کرتے ہوئے متعدد فلسطینی جوانوں کو گرفتار کرلیا جبکہ علاقے کے تمام داخلی راستے بند کرتے ہوئے ایک فلسطینی کا گھر بھی مسمار کردیا۔

تفصیلات کے مطابق اسرائیلی فوج نے مقبوضہ بیت المقدس میں سلوان میں واقع بطن الھویٰ کے علاقے میں بیت المقدس سے تعلق رکھنے والے متعدد نوجوانوں کو مار پیٹ کرنے کے بعد گرفتار کرلیا۔

مقبوضہ بیت ا لمقدس کے ذرائع نے کہا  کہ سلوان میں بطن الھویٰ کے علاقے میں درجنوں شہریوں اور قابض پولیس کے مابین جھڑپیں ہوئیں جنہوں نے نوجوانوں کو گرفتار کیا اور انہیں نامعلوم حراستی مرکز میں لے گیا۔

یاد رہے کہ اس علاقے میں مستقل طور پر فلسطینیوں کو ان کے گھروں سے بے دخل کرنے اور ان کی جگہ پر آباد ہونے کے لیے صہیونی آبادکاروں کے ساتھ جھڑپیں ہوتی رہتی ہیں۔

قابل ذکر ہے کہ مقبوضہ بیت المقدس میں سلوان کے علاقے پر صہیونی یلغار اور فلسطینی شہری کے گھر کو تباہ کرنا فلسطین کی حالیہ پیشرفت میں شامل ہیں۔

صہیونی حکومت غیرقانونی تعمیر کا بہانہ بنا کر مقبوضہ بیت المقدس کے مختلف علاقوں میں فلسطینیوں کے مکانات کو تباہ کررہی ہے۔