ایران کے خلاف کسی بھی جارحیت کا مطلب ہمارے خلاف جارحیت ہے: حزب اللہ

سچ خبریں: حزب اللہ نے واضح کر دیا ہے کہ ایران کے خلاف کسی بھی ممکنہ امریکی جارحیت کو وہ اپنے خلاف سمجھیں گے۔ 

تاہم ذرائع کا کہنا ہے کہ تنظیم نے صورتحال کا جائزہ لینے کے بعد ہی کوئی حتمی موقف اپنانے کا فیصلہ کیا ہے۔

العربی الجدید کے مطابق حزب اللہ کے متعدد ذرائع نے موقف دہراتے ہوئے کہا کہ تنظیم کے سیکرٹری جنرل شیخ نعیم قاسم پہلے ہی ایران سے یکجہتی کا اعلان کر چکے ہیں اور ابھی تک اس معاملے میں کوئی نئی پیش رفت نہیں ہوئی۔ ان ذرائع نے جو نام ظاہر نہیں کرنا چاہتے تھے، زور دے کر کہا کہ امریکہ کی جانب سے ایران پر کوئی بھی جارحیت حزب اللہ کے خلاف بھی تصور کی جائے گی۔

تاہم ان کا مزید کہنا تھا کہ حزب اللہ پیشگی فیصلے نہیں کرے گی بلکہ اس کا حتمی موقف صورتحال اور میدانی پیش رفت کے مطابق ہوگا۔ ذرائع نے یہ بھی انکشاف کیا کہ بعض عناصر موجودہ صورتحال کا فائدہ اٹھاتے ہوئے جعلی اور من گھڑت بیانیے کے ذریعے حزب اللہ کے گردونواح کو اس کے خلاف بھڑکانے کی کوشش کر رہے ہیں۔

ان ذرائع نے لبنان کے قومی مفادات سے حزب اللہ کی وابستگی اور حساسیت پر بھی زور دیا۔ العربی الجدید نے انہیں ذرائع کے حوالے سے یہ دعویٰ بھی کیا کہ شیخ قاسم نے ایران پر حملے کی صورت میں حزب اللہ کی فوجی مداخلت کے بارے میں کوئی حتمی اعلان نہیں کیا اور تمام امکانات کو کھلا چھوڑ دیا ہے۔