حماس نے کہاں کہاں صیہونیوں کی ناک رگڑی؛فوجی امور کے معروف ماہر  کی زبانی

سچ خبریں:فوجی امور کے معروف ماہر بریگیڈیئر جنرل فایز الدویری نے آپریشن طوفان الاقصی کی اہم جہتوں اور صیہونی فوج کی تین سطحوں پر ناکامی کے بارے میں تفصیلات بیان کی ہیں۔  

الجزیرہ نیوز چینل کی رپورٹ کے مطابق، اسرائیلی فوج کی جانب سے کی جانے والی تحقیقات اس بات کی تصدیق کرتی ہیں کہ حماس نے قابض فوج کو اسٹریٹجک، آپریشنل اور ٹیکٹیکل تینوں سطحوں پر فریب دینے میں کامیابی حاصل کی ہے۔

یہ بھی پڑھیں:فلسطینی مزاحمت کو میدان جنگ میں کیوں فاتح قرار دیا گیا؟

طوفان الاقصی ایک اسٹریٹجک آپریشن تھا جس کی پیشگی علامات موجود ہونے کے باوجود تل ابیب اسے قبل از وقت روکنے میں ناکام رہا،صیہونی فوج کے مطابق، غزہ ڈویژن آپریشن کے ابتدائی گھنٹوں میں ہی مکمل طور پر تباہ ہو گئی تھی،تحقیقات کے مطابق، حماس کے رہنما یحییٰ السنوار 2017 سے اس آپریشن کی منصوبہ بندی کر رہے تھے۔

رپورٹ کے مطابق، اسرائیلی فوج کو توقع نہیں تھی کہ حماس ابتدائی حملے میں 3000 سے زائد راکٹ فائر کرے گی۔ اس کے علاوہ، حماس کے جنگجوؤں کا اسرائیلی خفیہ بیس 8200 جیسے حساس فوجی مراکز تک پہنچ جانا، قابض فوج کے لیے ایک غیر متوقع جھٹکا تھا۔

حماس کی طرف سے کی گئی فریب کاری نے اسرائیلی فوج کو 1973 کی جنگ میں مصری محاذ پر کیے گئے آپریشن کی یاد دلا دی، جہاں اسی طرح کی حکمت عملی سے اسرائیل کو زبردست نقصان پہنچا تھا۔

تل ابیب غزہ کو ایک ثانوی محاذ سمجھ رہا تھا اور اس کی زیادہ توجہ ایران پر مرکوز تھی۔ 2006 سے جاری محاصرے اور حزب اللہ کی بڑھتی ہوئی طاقت نے صیہونی حکومت کو یہ غلط فہمی دی تھی کہ حماس ایک غیر مؤثر قوت بن چکی ہے۔

اسرائیلی قیادت کا خیال تھا کہ حماس کے پاس اسرائیل کی حساس معلومات نہیں ہیں، لیکن طوفان الاقصی کے بعد یہ واضح ہو گیا کہ حماس نے نہ صرف فوجی معلومات اکٹھی کی تھیں، بلکہ عملی طور پر اسرائیلی دفاعی نظام کی کمزوریوں سے بھی بخوبی واقف تھی۔

یہ تحقیقات صیہونی فوج کی اندرونی ساخت پر شدید اثرات مرتب کر سکتی ہیں۔ پہلے ہی فوجی قیادت میں استعفوں کی لہر شروع ہو چکی ہے، اور اس ناکامی کے بعد مزید عہدیداروں کے مستعفی ہونے کی توقع کی جا رہی ہے۔

مزید پڑھیں:اسرائیلی فوج کے سابق چیف آف سٹاف نے بھی کی تسلیم غزہ جنگ میں اسرائیل کی شکست 

اسرائیل کی فوجی حکمتِ عملی میں تبدیلی آ سکتی ہے تاکہ مستقبل میں اس نوعیت کے حملوں کو روکا جا سکے۔

خطے میں طاقت کا توازن متاثر ہو سکتا ہے، کیونکہ حماس کی اس حکمت عملی نے اسرائیل کی سیکیورٹی صلاحیتوں پر سنگین سوالات کھڑے کر دیے ہیں۔

اسرائیلی قیادت کو اندرونی اور بیرونی دباؤ کا سامنا ہوگا، جس سے قابض فوج کی ساکھ مزید متاثر ہو سکتی ہے۔