صہیونی ریاست کے سابق سفارتکاروں نے اسرائیل کو فرقہ پرست قرار دیتے ہوئے عالمی برادری سے اہم اپیل کردی

?️ 9 جون 2021

تل ابیب (سچ خبریں)  صہیونی ریاست کے سابق سفارتکاروں نے اسرائیل کو فرقہ پرست ریاست قرار دیتے ہوئے عالمی برادری سے اہم اپیل کرتے ہوئے کہا ہے کہ اسرائیل کے خلاف اہم اقدام اٹھانے کی ضرورت ہے۔

تفصیلات کے مطابق دو سابق صہیونی سفیر جو جنوبی افریقہ میں بھی خدمات انجام دے چکے ہیں انہوں  نے مغربی کنارے پر اسرائیلی قبضہ کو فرقہ پرستی قرار دیتے ہوئے اس کے خلاف عملی اقادم اٹھانے کی اپیل کی ہے۔

میڈل ایسٹ ویب سائٹ کے مطابق، سابق اسرائیلی سفیران، ایلان باروچ اور ایلون لیل، جو 2000 سے 2001 تک اسرائیلی وزارت خارجہ کے ڈائریکٹر جنرل بھی رہ چکے ہیں انہوں  نے اس بات پر زور دیا ہے کہ اسرائیل اور مقبوضہ فلسطین میں شدید فرقہ پرستی اور عدم مساوات کی فضا قائم ہوچکی ہے۔

ان سفارتکاروں نے مزید کہا کہ اسرائیل نے نصف صدی سے بھی زیادہ عرصے سے مقبوضہ فلسطینی علاقوں پر حکومت کی ہے اور اسرائیلی آباد کار شہری قانون کے تحت رہتے ہیں جبکہ فلسطینی مارشل لاء کے تحت ایک فوجی چھاونی میں زندگی گزارنے پر مجبور ہیں۔

ان دونوں سفارت کاروں نے مغربی کنارے میں اسرائیلی حکومت کے غیر قانونی تعمیرات کا ذکر کرتے ہوئے کہا کہ آج، مغربی کنارا 165 غیر قانونی بستیوں سے گھرا ہوا ہے اس کا مطلب ہے یہ کہ فلسطینی برادری اسرائیل کی جانب سے قائم غیر قانونی بستیوں میں گھری ہوئی ہے۔

صیہونی حکومت کے دو سابق سفارتکاروں نے اس حکومت کے اقدامات کو جنوبی افریقہ میں نسل پرستی کے دور سے تشبیہ دیتے ہوئے انتباہ کیا ہے کہ فلسطینی سرزمین پر قبضہ عارضی نہیں ہے اور نہ ہی تل ابیب اس قبضے کے خاتمے کے لیئے کسی قسم کی سیاسی پیشرفت کے لیئے راضی ہے۔

ان دونوں سفارت کاروں نے اعتراف کیا کہ اب وقت آگیا ہے کہ دنیا یہ تسلیم کرے کہ جو کچھ ایک عرصہ پہلے ہم نے جنوبی افریقہ میں دیکھا وہ اب مقبوضہ فلسطینی علاقوں میں بھی ہورہا ہے۔

انہوں نے مزید کہا کہ اب وقت آگیا ہے کہ دنیا فیصلہ کن سفارتی اقدام کرے اور فلسطینیوں کے مساوی مستقبل، وقار اور سلامتی کے لئے کام کرے۔