بدنام زمانہ دہشت گرد تنظیم داعش کے سربراہ ابوبکر البغدادی کے اہم ساتھی کو گرفتار کرلیا گیا

?️ 3 مئی 2021

استنبول (سچ خبریں) بدنام زمانہ دہشت گرد تنظیم داعش کے سربراہ ابوبکر البغدادی کے اہم ساتھی کو ترکی میں گرفتار کرلیا گیا ہے۔

موصولہ اطلاعات کے مطابق ترک پولیس کا کہنا ہے کہ دہشت گرد تنظیم داعش کے سربراہ ابوبکر البغدادی کے اہم ساتھی کو اتوار کے روز استبول سے گرفتار کرلیا گیا ہے۔
امریکی خبر رساں ادارے اے پی کے مطابق استنبول پولیس کا ایک بیان میں کہنا تھا کہ ابو بکرالبغدادی کے افغان ساتھی جس کا کوڈ نام باسم ہے کو اتاسہر ضلع میں ایشائی سائیڈ سے گرفتار کیا گیا۔

پولیس اور ترک انٹیلیجنس ایجنسی کے مشترکہ آپریشن کے حوالے سے مقامی میڈیا کی رپورٹس کے مطابق ملزم نے 2009 میں داعش کی شکست کے بعد البغدادی کو شام کے صوبے ادلب میں چھپنے میں مدد دی تھی۔

ترک میڈیا نے ملزم کی گرفتاری کے بعد کی ایک تصویر شائع کی ہے جس میں وہ ہلکی داڑھی اور سر کے بالوں کے بغیر نظر آرہے ہیں، ساتھ ہی ملزم کی ایک پرانی تصویر بھی شائع کی گئی ہے جس میں ان کے لمبے لمبے بال اور گھنی ڈاڑھی ہے اور وہ فوجی وردی پہن کر تلوار تھامے کھڑے ہیں۔

مقامی نیوز ایجنسی دیمیرورن کے مطابق باسم شام اور عراق میں شدت پسند تنظیم کے ٹریننگ کیمپ چلایا کرتے تھے، رپورٹ کے مطابق ملزم ترکی میں جعلی پاسپورٹ اور شناختی کارڈ پر آئے۔

ترکی تواتر کے ساتھ داعش سے وابستہ مشتبہ افراد کو گرفتار کرتا رہا ہے جن میں سے کئی ایک ملک میں دہشت گردی کی کاروائیوں کی منصوبہ بندی کر رہے تھے۔