کابل سے یوکرائنی طیارہ اغوا ہونےکی تردید

?️ 24 اگست 2021

سچ خبریں:یوکرین کی وزارت خارجہ کے ترجمان اولیگ نیکولینکو نے ان خبروں کی تردید کی ہے کہ یوکرائنی طیارہ افغانستان سے ہائی جیک کر کے ایران لے جایا گیا ہے۔
یوکرین کی وزارت خارجہ کے ترجمان اولیگ نیکولینکو نے ان خبروں کی تردید کی ہے کہ یوکرائنی طیارہ افغانستان سے اغوا کیا گیا اور ایران لے جایا گیا، انہوں نے یہ بھی بتایا کہ اس طیارے کے ہائی جیکنگ کے بارے میں شائع ہونے والی خبریں درست نہیں ہیں۔

واضح رہے کہ اس سے قبل یوکرین کے نائب وزیر خارجہ یووجینی ینین نے دعویٰ کیا تھا کہ یوکرائنی شہریوں کو نکالنے کے لیے افغانستان بھیجے گئے یوکرائنی طیارے کو نامعلوم افراد نے ہائی جیک کر کے ایران پہنچا دیا تھا، انہوں نے دعویٰ کیا کہ گزشتہ اتوار کو ہمارے طیارے کو نامعلوم افراد نے ہائی جیک کیا تھا،انھوں نے کہا کہ منگل کے روز طیارہ عملی طور پر ہم سے چوری کیا گیا تھا اور یوکرین کے شہریوں کے بجائے مسافروں کے ایک گروپ کو لے کر ایران چلا گیا جس کی شناخت ہم نہیں جانتے۔

انھوں نے مزید کہ اس واقعے کے بعدہم نے یوکرینیوں کو نکالنے کے لیے مزید تین بار کوشش کی ، تاہم کامیاب نہیں ہوسکے کیونکہ ہجوم کی وجہ سے یوکرین کے لوگ ہوائی جہاز میں سوار نہیں ہو سکے،ینین نے طیارے کی صورتحال کے بارے میں کوئی معلومات فراہم نہیں کیں۔

دریں اثنا ، ایرانی ایوی ایشن آرگنائزیشن کے ترجمان نے یوکرین کے طیارے کے ہائی جیکنگ کے الزام کی تردید کرتے ہوئے کہاکہ اس طیارے نے کل مشہد ائیرپورٹ پر ایندھن بھرا اور 21:50 پر کیف ہوائی اڈے پر اترگیا۔