وینزویلا کے صدر ملک چھوڑنے کی تیاری کر رہے ہیں:امریکی میڈیا کا پروپگنڈہ 

?️ 2 دسمبر 2025

وینزویلا کے صدر ملک چھوڑنے کی تیاری کر رہے ہین:امریکی میڈیا کا پروپگنڈہ

امریکی میڈیا خصوصاً سی این این کی جانب سے یہ دعویٰ سامنے آیا ہے کہ وینزوئیلا کے صدر نیکولاس مادورو مبینہ طور پر ملک چھوڑنے کی تیاری کر رہے ہیں، جبکہ کاراکاس بارہا اس نوعیت کے دباؤ اور امریکی دھمکیوں کو مسترد کرتا آیا ہے۔

سی این این نے اپنے ذرائع کے حوالے سے دعویٰ کیا تھا کہ مادورو نے امریکی حکام سے رابطہ کرکے آئندہ اٹھارہ ماہ کے اندر اقتدار چھوڑنے کی آمادگی ظاہر کی ہے۔ اس دعوے کے مطابق وائٹ ہاؤس نے اس تجویز کو مسترد کرتے ہوئے ان سے ملک کے فوری ترک کرنے کا مطالبہ کیا ہے۔ امریکی صدر نے بھی بعض میڈیا رپورٹس میں مادورو کے ساتھ ٹیلیفونک رابطے کی تصدیق کی لیکن اس کے بارے میں تفصیلات فراہم نہیں کیں۔ اسی دوران دائیں بازو کے میڈیا ادارے فاکس نیوز نے دعویٰ کیا کہ ٹرمپ انتظامیہ نے مادورو کو سخت الٹی میٹم دیا ہے کہ وہ فوراً وینزوئیلا چھوڑ دیں۔

یہ دباؤ ایسے وقت میں ڈالا جا رہا ہے جب وینزوئیلا کی حکومت حالیہ ہفتوں میں بارہا یہ اعلان کر چکی ہے کہ وہ اپنی حاکمیت کے خلاف کسی بھی “استعماری خطرے” یا بین الاقوامی قوانین کی خلاف ورزی کو برداشت نہیں کرے گی۔ امریکی صدر ڈونلڈ ٹرمپ اس سے پہلے کہہ چکے تھے کہ امریکہ جلد ہی وینزوئیلا میں منشیات کی اسمگلنگ روکنے کے بہانے زمینی فوجی کارروائی شروع کرسکتا ہے، اور انہوں نے دعویٰ کیا تھا کہ وینزوئیلا کی فضائی حدود کو بند تصور کیا جانا چاہیے۔

کاراکاس نے ان بیانات کو مسترد کرتے ہوئے کہا کہ وہ اپنی فضائی حدود کے احترام کا مطالبہ کرتا ہے اور کسی بیرونی حکم یا دھمکی کو قبول نہیں کرے گا۔ اس کے جواب میں مادورو نے وردی میں، حکومتی ارکان اور قومی مسلح افواج کے کمانڈروں کے ساتھ کھڑے ہو کر کہا کہ وہ اپنے ملک کے ہر انچ کا ہر طرح کے سامراجی خطرے اور ممکنہ جارحیت سے دفاع کریں گے۔

مادورو نے حالیہ دنوں میں یہ بھی کہا کہ امریکہ کی سرگرمیاں دراصل وینزوئیلا کے وسیع تیل کے ذخائر پر قبضے کے لیے ایک خطرناک فوجی اقدام کا مقدمہ ہیں۔ ان کے مطابق امریکہ کا مقصد وینزوئیلا کی سرزمین، عوام اور ریاستی اداروں کو نشانہ بنا کر اس کے وسائل پر تسلط قائم کرنا ہے۔ انہوں نے زور دیا کہ وینزوئیلا اپنے توانائی ذخائر کا بھرپور دفاع کرے گا اور کسی بھی قسم کی بلیک میلنگ یا دباؤ کے سامنے جھکنے والا نہیں۔

امریکی حکومت گزشتہ اگست سے منشیات کی اسمگلنگ کے نام پر کیریبیئن اور بحرالکاہل میں جنگی جہازوں، آبدوز، فوجی طیاروں اور دیگر فوجی دستوں کو تعینات کر چکی ہے اور کسی ٹھوس ثبوت کے بغیر مادورو پر منشیات کے ایک بڑے کارٹل کی سربراہی کا الزام لگا رہی ہے۔ امریکی کارروائیوں کے نتیجے میں اب تک کم از کم تراسی افراد جان سے جا چکے ہیں۔

ان بڑھتے ہوئے دباؤ کے تناظر میں مادورو نے ایک بار پھر تیل پیدا کرنے والے ممالک سے اپیل کی ہے کہ وہ امریکہ کے اقدامات کی مذمت کریں، اور انہوں نے اس عزم کا اظہار کیا کہ وینزوئیلا اپنے قومی وسائل کے تحفظ کے لیے ہر ممکن اقدام کرے گا۔